BARRY MANLEY: “Jendearen aurrean aritzea droga da niretzat”

BARRY MANLEY: “Jendearen aurrean aritzea droga da niretzat”
2012/04/12 eta kitto!

-Irlandar bat euskarazko bakarrizketak egiten. Nola da hori?
Urte asko daramatzat Euskal Herrian. 22 urterekin etorri nintzen (50 ditut) eta euskara ikasteko jakinmina neukan, munduko hizkuntza zailenetarikoa delako, eta hemengoa. Guk, Irlandan, ez dugu gaelikoz hainbeste berba egiten. Urteak pasa dira eta nire kabuz ikasi dut hizkuntza, autoikaskuntza erabiltzen dut horretarako, oraindik ikasten dihardudalako. Ni, berez, idazlea naiz, eleberriak idatzi ditut. Gazteleraz ere sortze-literatura ikastaroren bat egin izan dut. Baina nire asmoa euskaraz zerbait egitea zen eta orain dela lau urte, liburu bat idazten nengoela (istorio luzea da baina laburbilduko dut), umorista zen pertsonai batek bere buruaz beste egin zuen. Orduan, pertsonai hori jendearen aurrean nola sentitzen zen jakin nahi nuen. Horrela, lagun batek esan zidan Gaztetxe batera joateko bakarrizketa egitera. Joan eta ia ordubetez egon nintzen han. Ordutik, hainbat lekutatik deitu didate eta iaz Bilabonako bakarrizketa lehiaketan hartu nuen parte. Han jende asko ezagutu nuen eta, horrezkero, 20 bat saio egin ditut. Hor jarraitzen dut oraindik. Niretzat bidaia bezalakoa da, ez dakit nora noan.
-Momentuz Eibarrera.
Bai, hala da. ‘An Seanachai Road Show’ izeneko iksukizunarekin nator. ‘Seachanai’-a ipuin-kontalaria da gaelikoz. Ingelesez ‘Stand up comedy’ delakoa gustatzen zait, gazteleraz ‘Club de la comedia’, baina gauza ezberdinak dira. Nik horrelako zerbait egitea nahi nuen hemen, ‘Stand up comedy’ euskaraz. Hau egitea demaseko erronka da niretzat eta oso pozik nago ikuskizunak jendearen artean izan duen harrerarekin. Azkoitian, Azpeitian, Bilabonan, Andoainen, Irunen… egon izan naiz (batzutan bakarrik, batzutan beste artistaren batekin).
-Nolakoa izango da ‘An Seanachai Road Show’ ikuskizuna?
Saio multimedia da. Mattin komikilariak marrazkiak egin ditu nire testuak irakurri ostean eta, horrela, nire txiste eta istorioak marrazkiekin batera kontatzen ditut. Saioaren munduko aurre-estreinaldia (barreak) joan den astean Donostiako San Telmo museoan egin nuen. Demaseko gogoa daukat saioa egiteko. Zertan datzan saioak? Lehenengo zatian euskaraz ikasteko prozesuari eta euskararen egoerari buruz egiten dut berba. Gaelikoarekin konparatzen dut pixka bat. Bigarren zatian, orokorrean, Irlanda eta Euskal Herriaren artean konparaketa egiten dut. Herrialdeen berdintasun eta ezberdintasunak nire ikuspuntutik. Ordubeteko ikuskizuna da. Badakit Euskal Herrian ez dagoela ordubeteko saioak egiteko ohitura, baina ni ohituta nago, eroso sentitzen naiz eta ondo pasatzen dut. Jendearen aurrean aritzea gustatzen zait, droga da niretzat. Eibarren jendeak ez nau ezagutzen eta alderdi hori asko gustatzen ‘jata’, zuek diozuen bezala.
-…
Gustatzen zait toki ezberdinetako jendearekin harremanak egitea. Adibidez, Espainiako ‘Club de la comedia’-n batzuk onak dira, baina iruditzen zait gehien bat besteen gidoiak lantzen dituzten aktoreak direla; eta nik materiala daukat. Batzuetan lapurtzen dut, baina gehiena nirea da.
-‘Seanachai’ delakoa gaelikoz ipuin-kontalaria dela aipatu duzu. Moduren batean Irlandako tradizio hori mantentzen duzu Euskal Herrian?
(Pentsakor) Bai. Nire aitona ipuinlaria izan zen, adibidez. Nire asmoa barrea eragitea da eta ‘stand up comedy’ egin nahi dut horretarako, baina saioak ordubete irauten duenez gero, istorioak kontatzeko aukerak ditut.
-Badaude ‘Seanachai’-ak Irlandan gaur egun?
Ez, baina ‘stand up comedy’ egiten da eta uste dut nahiko antzekoa dela. AEB, Irlanda edo Ingalaterran, adibidez, milaka pertsonen aurrean aritzen dira umoristak. Hemen bertsolaritza daukagu. Semearekin BECeko finalean izan nintzen eta 10.000 pertsona batu ginen han. Zentzu horretan berdina da, baina nire nahia da hemen ‘stand up comedy’-aren presentzia handitzea. Euskal Herrian Euskarazen ekimenez, Beñat Gaztelumendi bertsolariarekin lanean dihardut. Nire testuak irakurri zituen, zuzenketak egin, ideiak bota eta hor ari gara lanean. Beste batean, Jon Maya eta Unai Agirreren bertsolaritza saio baten atsedenaldian aritu nintzen eta oso ondo egon zen. Giro egokiena da hori, bazkari edo afalostean jendeak kopatxoak edan dituenean, lasai dagoenean.
-Irlanda eta Euskal Herriaren artean konparaketa egingo duzula aipatu duzu. Publikoari dagokionez ere ezberdintasunak daude?
Asko eskertzen diot hemengo jendeari eman didaten erantzuna, nirekin nola portatzen diren. Bestetik, horrelakorik ez dut inoiz egin irlandan. Publikoa atsegina da, hotza, baina hori ez dut zertan esan behar, badakizue, ez naiz ni Irlandatik etorriko nolakoak zareten esateko. Gainera, egur pixkat ematen dut.
-Umorea unibertsala da?
Bai, baina ona den umorea. Honekin ez dut esan nahi nire ona denik, baina nire filosofia umorea mezuarekin da eskaintzea. Besteak beste, nire mezua da nahiz eta kanpotarra izan euskaraz ikasi daitekeela.