Egaña eta Iturriaga bertsolariek girotutako afaria gaur Kultun

Eguaztenean Kultu tabernan Iñigo Mantzizidor "Mantxi", Julen Zelaieta eta Eli Pagola bertsolariek eskainitako saio arrakastatsua eta gero, gaur gauean (barixakua, hilak 13), 21.00etan Kultu tabernan hasiko den bertso-afariarekin biribilduko dute Arrate Kultur Elkartearen martxoko Bertso Astea. Gaurkoan Andoni Egañak eta Unai Iturriagak egingo dute bertsotan, Jon Mikel Mujikak emandako gaiei jarraituta eta, azken orduan animatuz gero, oraindik txartela eskuratzeko aukera badago, tabernan bertan (19 eurotan Arrate Kultur Elkarteko bazkideek, langabetu eta ikasleek; gainontzekoek 23 eurotan). Egitaraua Hankamotxak Bertso Eskolak eta Kulturalak elkarlanean antolatu dute, 19. Korrika Kulturalaren barruan.