Zabaldu da Errigorako saskiak eskatzeko epea, '10 urte bete-bete' lelopean

Urtero moduan, Errigorak Nafar Hegoaldeko produktuz betetako saskiak saltzeko kanpaina jarri du martxan eta Eibarren ere saskiak eskatzeko aukera izango da. Errigorak 10 urte bete ditu, eta urteurren hori ospatzeko kanpaina berezia hasi du, "10 urte bete-bete" lemapean. Aurten saski bakarra izango da, 50 eurokoa eta 23 ekoizlek ekoiztutako bederatzi produktu ekologiko eta konbentzionalak izango ditu.  Informazio zehatza eta eskariak egiteko aukera www.errigora.eus webgunean izango da.

Saskiak azaroaren 9ra bitartean eskatu ahalko dira eta azaroaren 21ean jaso ahalko dira Eibarren bertan, arratsaldeko 17:00etatik 20:30era bitartean, Untzagako Zinean.

Errigorako antolakuntzak azpimarratu nahi du saski bakoitzaren balioaren %25 Nafarroa Hegoaldeko euskalgintzara bideratzen dela. Hala, hamar urteotan Errigorak tokiko ekoizpena bultzatzeaz gain, bertako euskalgintzari ere laguntza handia eman dio, izan ere, 1.800.000 euro bideratu baitizkio.

23 ekoizleren produktuak
23 ekoizleren ohiko bederatzi produktu ekologiko eta konbentzionalak nahasian egongo dira. Zehazki ekoizleak hauek dira: Ablitasgo kooperatiba, El Alcaraván (Argedas), El Agricultor (Lerin), Aristu (Irunberri), Axuribeltz (Iturgoien), Azanza (Abartzuza), Azpea (Irunberri), Biosasun (Discastillo), La casa del aceite (Cascante), Bardea (San Isidro del Pinar), La Churta (Allo), Ebrón (San Adrian), Enara (Arroitz), El Escolar (San Adrian), Gobeiaberri (Lodosa), Hazialdeko (hainbat herri), Iturri (Arroitz), Lezaun (Lakar), Martinelli (Beriain), Mendiko (Oibar), El Molinero (Arroitz), Monasterio de Cascante eta Urrutia (Uxue).