"Munduari Kolorea Ematen” GKEko kide gazteek omenaldia jaso dute Gipuzkoako Elikagaien Bankuan

Atzo, eguaztena,  Gipuzkoako Elikagaien Bankuak Bergaran duen egoitzan omenaldi xumea egin zieten Eibarko “Munduari Kolorea Ematen” GKEko kide eta fundatzaileei. Maitane, Amaia, Malen eta Anek, 11 urte besterik ez zituztela, GKE hau sortu zuten 2022an, behartsuenei laguntzeko. Dagoeneko 18 laguntzaile aktibo daude taldean, eta horrek indarra emango die etorkizunean egingo diren ekintzei.

Belén Méndez de Vigo Gipuzkoako Elikagaien Bankuko lehendakariak, Bergarako egoitzako zuzendari Jose Maria Beitiarekin batera, diplomak eta opariak eman zizkien atzoko ekitaldian Maitane, Amaia, Malen eta Aneri. Modu horretan, gizarte guztiaren esker ona adierazi  nahi izan zieten  behartsuenekin duten sentikortasun goiztiarragatik  Eibartik joandako lau gazteak taldeko beste 14 kide berriak ordezkatzen aritu ziren, gainera. Taldekide berriak Irune, Markel, Eluney, Malen A., Leire, Nora, Itziar, Asier, Eider, Ane C., Paule, Amaia A, Aitana eta Nadia dira. Gehienek 13 urte dituzte orain, eta DBH2 ikasten dute La Salle Azitainen.

Gure erkidegoan, pobrezia-indizea %12,2koa da, eta hilaren bukaerara iristeko arazoak dituzten familiak %31,6 dira. Hori dela eta GKE gazte talde honek Gipuzkoako Elikagaien Bankuarekin lankidetzan dihardu, lantzian behin, kaleko ekintzak antolatzen. Azkenak irailaren 29an eta 30an egin ziren Eibarko Untzaga plazan, eta tona bat elikagai ez-galkor biltzea lortu zuten.