365 Egun esaldia izango da Euskararen Eguneko protagonista nagusia Eibarren

"365 Egun" goiburu ezaguna bere egingo du aurtengo Euskararen Egunak Eibarren, euskaraz eta Eibarren berbak gehituz. Eibarko Euskalgintzaren mahaiak asteak daramatza elkartzen eta aurtengo Euskararen Eguna hasi da dagoeneko forma hartzen. Forma baino gehiago, egunean bertan antolatuko den ekintza pentsatuta dute-eta: “365 Egun esaldia izango da Euskararen Eguneko protagonista nagusia. Zazpi hizki horietako bakoitza agertzen den beste horrenbeste panel handi egin ditugu, hizkiak hutsik egongo dira eta herritarrek egin beharko dutena da hutsune horiek pegatinekin bete, horrela hizki bakoitzak kolore bat izango du”, diote Euskalgintzaren mahaitik. Hori guztia jai-giroan egingo da, musikak lagunduta, abenduaren 3an, domeka, eguerdiko 13:00etatik 14:30era Untzagan, harmailen aldean, eta euria egingo balu Untzagako karpan. Antolatzaileek argi zuten dinamika parte-hartzailea egin nahi zutela, herritar guztiek parte hartzeko modukoa, haur zein heldu, eta dei egiten diete herriko euskaltzale guztiei, “etor daitezela aurten ere, ozen aldarrikatzera Eibarren euskaraz bizi nahi dugula”.

Adimen artifiziala ere euskaraz
Euskararen Egunaren bueltan “Gaitu maratoia” izeneko ekintza ere antolatu da, eta eibartarrok, beraz, badugu erronka berri bat: “Adimen artifizialak euskaraz egin dezan milaka eredu behar ditu, hau da, euskaraz erakutsi behar diogu. GAITU proiektuaren bidez, Mozilla fundazioak martxan jarritako Common Voice ekimena elikatuko da. Horrela, euskarak testuinguru digitalean dagokion presentzia izango du, teknologia arloan duen erabilgarritasuna finkatuko du eta erabilera-eremuak handituko ditu”, adierazi digu Ane Albisu Akebaiko arduradunak.

Euskal Herri mailako kanpaina urrian abiatu zen eta herri askotan, baita Eibarren ere, hainbat maratoi antolatu dira Euskararen Egunaren inguruan. Eibartarron kasuan maratoi horretarako erronka izango da bi egunetan 12.500 esaldi grabatzea.  Akebairen guardasolpean antolatutako ekimen honetan hainbat eragilek hartuko dute parte, baina herritarrak edozein momentutan hurbildu daitezke ondorengo leku eta ordutegian: Abenduaren 1ean, barixakua, Errebalen 18:00etatik 21:00etara, eta abenduaren 2an, zapatua, Untzagan (harmailen aldean) 11:00etatik 14:00etara. Edozein arrazoi dela-eta egun horietan parte hartzeko aukerarik ez duenak edota bere kabuz egitea nahiago duenak bideo honetan ikus ditzake jarraibideak: