%62,2 igo da Gizarte Zerbitzuetara lehen aldiz jotzen duten bizikidetza-unitateen kopurua Eibarren
Eibarko Udaleko Gizarte Zerbitzuen Harrera Zerbitzuaren jarduerak nabarmen egin du gora 2026ko lehen seihilekoan. Udalak emandako datuen arabera, urtarriletik ekainera 691 hitzordu egin dira, iazko epe berean baino %33,7 gehiago. Horrez gain, lehen aldiz edo azken bost urteetan zerbitzuarekin harremanik izan ez duten 180 bizikidetza-unitateri eman zaie arreta; iaz, berriz, 111 izan ziren. Horrek %62,2ko igoera ekarri du.
Udalaren esanetan, seihilekoko balantzeak erakusten du artatutako egoerak gero eta konplexuagoak direla, batez ere etxebizitzarekin eta bizitegi-bazterketarekin lotutakoak. Aurten, erroldarik gabeko 55 bizikidetza-unitateri eman zaie arreta, iaz baino 20 gehiagori. Horietatik 13 kale-egoeran zeuden edo bizitzeko egokiak ez diren lokal edo guneetan bizi ziren. Udalaren ustez, datu horiek agerian uzten dute etxebizitza duin eta egonkorra eskuratzeko zailtasunak gero eta handiagoak direla.
Herritarrek egindako kontsulten artean ohikoenak izan dira adinekoentzako baliabideei, mendekotasunaren balorazioei, desgaitasunei, laguntza ekonomikoei, etxebizitzari, erroldari, arreta goiztiarrari, immigrazioari eta gizarte-orientazioari lotutakoak.
Espedienteen kudeaketari dagokionez, Udalak 127 mendekotasun-balorazio eta berrikuspen izapidetu ditu, desgaitasunarekin eta arreta goiztiarrarekin lotutako 79 eskaera, 24 laguntza tekniko eta etxebizitzarekin lotutako 22 espediente, beste hainbat prestazio ekonomiko eta gizarte-laguntzarekin batera.
Datuen balorazioa egitean, Jon Iraola alkateak nabarmendu du gizarte-zerbitzu sendo eta hurbilak izatearen garrantzia, gero eta konplexuagoa den errealitate sozialari erantzuteko. Sonia Archeli Gizarte Zerbitzuetako zinegotziak, berriz, kezka agertu du etxebizitzarekin eta erroldatzearekin lotutako egoerek izan duten gorakadagatik, eta erakundeen arteko koordinazioa indartzeko beharra azpimarratu du.
