Afizionatuen mailako pilota partidu interesgarriak gaur Astelenan

Bihar palak hartuko du protagonismoa Katedralean, goiz eta arratsaldeko jaialdiekin
Afizionatuen mailako pilota partidu interesgarriak gaur Astelenan
2025/04/04 11:24
eta kitto!

Gipuzkoako Binakako Udaberri torneoak Errendimendu kategoriari ekingo dio asteburu honetan eta Eibarko Klub Deportiboko bi bikoteek etxean izango dituzte lehendabiziko partiduak. Arratsaldeko 18:00etan hasiko dan jaialdian, infantil mailako Saez-Oñederra bikoteak Urretxuko Goierri klubekoa izango du aurkari eta, ondoren, alebin mailan, Arrieta-Uskola bikote eibartarrak Idiazabalgo Aizkorpe klubeko bikotearen kontra jokatuko du.

Ondoren, 4 t’erdiko txapelketako lehendabiziko jardunaldiko partiduak ikusteko aukera izango da, senior mailakoak biak: Iraolagoitiak Zumarragako Vianarekin neurtuko ditu indarrak, eta Ibarrak, bestalde, Tolosako Iraeta izango du aurrean kaiolaren barruko partiduan.

Bihar palak hartuko du protagonismoa Katedralean, goiz eta arratsaldeko jaialdiekin. Hor Eibarko V. Pala Txapelketako jardunaldia izango da jokoan.