Aspaceren 50. urteurrena ospatzeko jaia egingo da zapatuan Errebal Plazan
Gaur goizean aurkeztu dute jaia Eibarko Udalean, eta bertan egon dira Jon Iraola alkatea, Rosa Iglesias Aspace Gipuzkoako presidentea, eta bi haurren amak diren Nagore eta Pilar. Azaldu dutenez, kalejira batek emango dio hasiera ekitaldiari, 17:00etan. Untzagatik irten eta Errebaleraino joango dira, trikitilariekin eta Algaraklown taldeko pailazoekin batera. Jaia Errebal Plazan izango da: 18:00etatik aurrera, Algaraklown taldekoen eskutik jolasak eta animazioak egingo dira, baita Simon Ezquiagaren emanaldia eta Alain Zulaika ilusionistaren ikuskizun bat ere. Ospakizuna Fredy eta Hugo DJek girotutako disko-festarekin amaituko da, eta Azitaingo sukaldaritza-eskolarekin elkarlanean antolatutako merienda bat ere egongo da.
Aspace Gipuzko taldearen historia guraso batzuen eskutik sortu zen orain dela mende erdi, garun-paralisia zuten euren seme-alabentzako arreta berezitua bermatzeko asmoz. Hasieran, Gipuzkoan kaltetutako familiei arreta ematea zuen xede elkarteak, eta lehen zerbitzuak Donostian eskaini zituen 1972an. Nolanahi ere, hasiera-hasieratik ikusi zen familiei bitartekoak hurbiltzeko premia zegoela, alegia, eskualdean ere zentroak sortzekoa.
1973an inauguratu zen Eibarko Aspace elkarteko lehen zentroa, garai bateko Tuberkulosiaren aurkako Sanatorioko lokalen Udalaren doako dohaintzari esker, eta obrek Umeen Benefizientziarako Eibarko Patronatuaren finantzazioa izan zuten. Zentro hau arreta integraleko modelo baten mugarria izan zen, eboluzionatzen joan zena profesional berriak formatuz eta garrantzi handiko figurak sortuz, hala nola begiraleak eta terapeuta okupazionalak.
Eratu zenetik, Aspace Gipuzkoa lanean aritu da garun-paralisia duten umeen eskolaratzea sustatzeko, eta heziketa bereziko aukerak eskaini ditu laguntza handiagoa behar dutenentzat. 50 urte hauetan zehar, ehundaka ikasle pasatu dira Eibarko eskolatik. Gaur egun, zentroak heziketa bereziko bi gela ditu, Eusko Jaurlaritzaren Hezkuntza Sailarekin hitzartutakoak.
Gaur egun, Eibarko Aspacek erreferente izaten jarraitzen du garun-paralisia eta antzerako alterazioak dituzten umeen heziketan eta arretan. Errespetuan eta ikasle bakoitzaren bakarkako gaitasunen balorazioan oinarritutako metodologia ardatz, zentroaren helburua ikasleen garapen integrala bultzatzea da, eta baita haiek gizarteratzea ere. Une honetan, Eibarko eskolan heziketa-premia handiko 10 ume daude, eta haietako bakoitzari egokitutako ikaskuntza-ingurua eskaintzen zaio.
Jon Iraola Eibarko alkateak herritar guztiak parte hartzera animatu ditu: “Herritar guztiak gonbidatu nahi ditut urteurren garrantzitsu honetarako antolatutako jarduera guztietan parte hartzera. Aspaceren ibilbidea eta elkarteak inklusioaren eta aukera-berdintasunen alde egiten duen lana aitortzeko egokiera ona da. Eibar aniztasunarekin eta justizia sozialarekin konpromisoa duen herria da, eta honelako ekitaldiek balio horien indartzea ahalbidetzen digute”.