Atzoko euriteen irudiak bideo batean bildu ditugu

Eguraldiari buruzko iragarpenak bete ziren atzo eta prezipitazioak eta ekaitzak protagonista izan ziren arratsaldean. Euria gogotik egin zuen Bizkaian eta Gipuzkoan, eta txingorra bota zuen hainbat lekutan, baita Eibarren eta Ermuan ere. Herriko kaleek urez gainezka egin zuten Eibarko eta Ermuko auzo askotan. Eibarren, Legarre auzoan sortu zen arazorik handiena eta Unbe bezalako instalazioak itxi egin zituzten, badaezpada.

Herritarren deiak ugariak izan ziren, kale, plaza, parke, garaje eta dendetan ura pilatzeak eragindako gorabeheren berri emateko. Hauek izan ziren aipagarrienak, Udaltzaingotik adierazi digutenez:

- Otaola etorbideko supermerkatu bat  itxi behar izan zuten, ura sartu zelako.
-  Urak hartu zituen Ubitxa kaleko eta Polonia Etxebarriako zenbait  etxebizitza.
-  Ura sartu zen erdialdeko hainbat garajetan
-  Unbe kirol-gunea  itxi zen, instalazioetan ur asko zegoelako.
-  Ura sartu zen Ipurua auzoko eta erdialdeko hainbat saltokitan.
-  Lur-jausia gertatu zen San Salvador inguruan.
-  San Juan eta Fermin kaleetako  galtzadetan ur-putzuak sortu ziren.

Eusko Jaurlaritzako Segurtasun Sailak abisu horia ezarri du gaurko ere prezipitazio handien arriskuagatik (12:00-00:00). Izan ere, Euskalmeten iragarpenaren arabera, ordubetean 15 litro baino gehiago pila daitezke metro koadroko. Zaparrada ertain eta trumoitsuak bota ditzake Kantauri isurialdean (Bizkaia eta Gipuzkoa), zenbait lekutan handiak izan daitezke, batez ere kostaldean. Euskalmeten iragarpenaren arabera, giro ezegonkor eta freskoa izango dugu gaur nagusi, mendebaldeko eta ipar-mendebaldeko haizeak tenperaturak jaitsaraziko baititu. Hortaz, 25 ºC-tik behera kokatuko dira maximoak.

Bideo honetan  bildu ditugu Eibarko eta Ermuko hainbat irudi: