Barixakuan Hypermotion Ligako partidua jokatuko du SD Eibarrek Elxen

Oraingoan Hypermotion Ligako 24. jardunaldiari hasiera ematea egokitu zaio Joseba Etxeberriaren taldeari eta barixakuan, arratsaldeko 20:30ean hasita, Elx CF-ri egingo dio aurre Martinez Valero zelaian. Neurketa prestatzeko hiru lan-saio besterik ez dituzte izango armaginek: gaur eta bihar goizez egin beharrekoak eta etziko azkena arratsaldez eta, ohikoari jarraituz, ateak itxita egitekoa. Gaur Ipuruan entrenatuko dute eta bihar Atxabalpen, kasu bietan 11:00etatik aurrera, eta partiduaren bezperako azken hori Ipuruan izango da berriro, 18:15etik aurrera.

Elche CF-ren aurkako partiduko sarrerak 20 eurotan erosi daitezke Orsaixanen gaur eta bihar, ohiko ordutegian. Sarrerak lortzeko, armaginen harremanetarako datuak eta datu pertsonalak aurkeztu beharko dira. Mezu elektroniko baliodun bat ere, sarrerak jasotzeko. Elche CF da sarrerak posta elektronikoz bidaltzeko arduraduna.