Beti Eibar-ek SD Eibarren akziodun gehiago bildu nahi ditu Batzar Nagusian Areitiori buruz galdetzeko
Beti Eibar elkarteak urriaren 23an egingo du Urteko Batzarra, 18:30ean, Armeria Eskolan, eta ekimen bat jarri du martxan hurrengo asteotarako. Izan ere, SD Eibarren 2025eko Batzar Nagusiari begira, Areitioko kirol-hiriari buruzko galderak egin nahi ditu eta, klubeko kontseiluak bere ekimenez sartzen ez baditu, kapitalaren % 5 beharko du galdera osagarriak sartzeko. Hau da, 2.310 akzio behar ditu kapitalaren % 5 edukitzeko eta, horretarako, 500 akzio gehiago lortu behar ditu.
Elkarteak adierazi duenez, “atxikipen-prozesua berehala jarri behar da abian, SD Eibar-en estatutuek bost eguneko epea ezartzen baitute, Batzar Nagusiaren deialdia argitaratzen denetik aurrera, eskaerak osagarriak aurkezteko, eta ia 500 akzio jasotzeko tarte laburregia da”.
Gauzak horrela, elkartekide ez dena eta ekintzen % 5 lortzeko ekimenarekin bat egin nahi duena info@betieibar.eus helbide elektronikoaren bidez jar daiteke harremanetan elkartearekin. Kide direnei dagokienez, Beti Eibar elkarteko arduradunak haiekin harremanetan jarriko dira atxikimendu-sinadura eskatzeko.
Areitiori buruzko galderak
Ekimen horren bitartez, SD Eibarrek Areition sortu duen kirol-hiriaren inguruan bi galdera egin nahi da klubaren Batzar Orokorrean. Alde batetik, Areitioko behin-behineko kostuak zeintzuk diren jakin nahi dute. “Obrak amaitzeko aurreikusitako kostuei buruzko informazio zehatza eta hasieran onartutako aurrekontuarekiko desbideratzeen azterketa”, euren berbetan. Eta bestetik, negozio-plana zein den jakin nahi dute. “Kirol-hiriaren plan espezifikoaren aurkezpena, etorkizuneko jasangarritasun-ildo estrategikoekin eta proiekzio ekonomikoekin”, diotenez.
