Bigarren Errepublikaren aldarria gogoratzeko hainbat jarduera antolatu ditu Udalak
Bigarren Errepublikaren aldarrikapen egunaren 94. urteurrena gerturatzen ari dela eta, horren harira hainbat jarduera antolatu ditu Eibarko Udalak. Horien artean, aipamen berezia merezi du apirilaren 13an egingo den Errepublika. Untzaga Plaza, oroimenaren lekua izeneko bisita gidatua. Jesus Gutierrez historialariak gidatuko du, eta bi saio egingo dituzte: lehena 11:00etan izango da, gazteleraz, eta bigarrena 12:30ean, euskaraz. Udaletxeko arkupeetan bilduko da taldea, eta handik hasiko da ibilbidea. Izena emateko epea astelehenean zabaldu zuten, eta apirilaren 7ra arte egin daiteke izen-ematea, Eibarko Udalaren web orrian dagoen esteka hauetako formularioaren bidez egin daiteke:
Plaza-kopurua mugatua da (25 pertsona taldeko), eta kopuru horretatik gorako eskaera egonez gero, zozketa egingo da. Parte-hartzaileen behin betiko zerrenda apirilaren 8an argitaratuko dute.
Argazki historikoak kalean
Bisita gidatuaz gain, apirilaren 14an argazki historikoak dituzten horma-irudiak jarriko dira herriaren hainbat tokitan, Bigarren Errepublikaren aldarrikapena gogoratzeko.
Jon Iraola Eibarko alkateak horrelako ekimenek Eibarko memoria historikorako duten garrantzia azpimarratu du: “Eibarrek paper garrantzitsua bete du Errepublikaren historian, eta horrelako ekintzek aukera ematen digute gure iragana gogoratzeko, eta hartaz hausnartzeko. Funtsezkoa da belaunaldi berriek jakitea zer gertatu zen eta garai hark zer adierazi zuen gure herriarentzat zein herrialde osoarentzat”.
Bestalde, Eibarko Udalak iragarri duenez, Arraten dagoen Gerra Zibilaren Interpretazio Zentroa berriz zabaltzen hasiko dira, apiriletik aurrera. Domekero zabalduko dute, 11:30etik 13:30era (Aste Santuko jai-egunetan ere bai, baina abuztuko hiru asteburutan (10ean, 17an ta 24an) itxita egongo da.
