Bihar goizean egingo da Olentzeroren kantu-kalejira
11:30ean Urkizun hasi eta Untzagan amaituko da.
2024/12/23
15:50
eta kitto!
Bihar goizean etorriko zaigu Olentzero Eibarrera bisitan, urteroko kantu-kalejiran parte hartzera, gauean etxerik etxe opariak banatzen hasi baino lehen. Bihar 11:30ean hasiko da Zatoz Olentzerorekin abestera! Eibarko Udalak antolatutako kantu-kalejira, Urkizuko parkean. Olentzerorekin batera, jakina, Mari Domingi, Galtzagorri bihurriak eta beste lagun asko elkartuko dira, Untzagarainoko bidean kantuan joateko. Besteak beste, Juan Bautista Gisasola Musika Eskolaren, Adolfo Jainagaren ikasleen, eta Eibarko Kantuzaleak eta Kaleetan Kantuz taldeen laguntza izango du ibilbide osoan zehar. Eta behin Untzagara ailegatuta, Olentzerok azken orduan idatzitako gutunak hartuko dizkie haurrei, udaletxeko patioan egingo dien harrera-ekitaldian.
