Bihar Mendi Tour Eibar 2025 programazioko bigarren eguna izango da Coliseon

Klub Deportiboko mendi taldeak antolatutako Mendi Jardunaldien barruan, Coliseok gaur eta bihar hartuko dituen proiekzioek osatuko dute aurtengo Mendi Tour-eko sekzioa. Biharkoa ere 18:30ean hasiko da eta beste lau film proiektatuko dituzte: Jim Aikman estatubatuarraren “The red rock revolution” (8 minutu), Darcy Hennessey kanadiarraren “Jamie” (18 minutu), Francesco Clerici eta Tommaso Barbaroren “The icebuilders” (15 minutu) eta, amaitzeko, Ander Salsamendi euskaldunaren “Hiru Haundiak. Taupadak eta gailurrak” (54 minutu). Lehenengoan eskalada izango da protagonista, bigarrenean alpinismoa, hirugarrenean klima aldaketa eta laugarrenean trail running-a. Sarrerak bost eurotan daude salgai.