Deporreko xakeko lehen taldea Gipuzkoako Maila Gorenera igo da

Aurreko asteburuan jokatutako azken jardunaldiaren ondoren, Eibarko Klub Deportiboko xake modalitateko lehen taldeak probintziako Maila Gorenera igotzea lortu du, horrela amaiera bikaina ezarriz denboraldiari. Azken fasera bere multzoko lider bezala sailkatuta, azken unera arte lehenengo posturako borrokan izan da Eibar A, azkenean Astigarraga A-rengandik puntu erdira geratzeko.

Azken jardunaldian eibartarrek bina berdindu zuten etxean Salto Bidasoa B-rekin jokatutako norgehiagokan. Diego Olmok bere partida irabazi zuen, Jon Aranak eta Xabier Beorlegik berdindu egin zituzten eurenak, eta Diogo Valek amore eman behar izan zuen berean. Sailkapen nagusian Astigarraga A-k 17,5 puntu lortu ditu eta Eibar A-k 17, talde biek mailaz igotzea lortuz; atzetik geratu dira Alfil B (15,5), Arrasate-Arlutz C (15) eta Salto Bidasoa B (14).