Eibar Igerixan hirugarren izan da Gipuzkoako Kluben Kopan
Aste Santu aurreko asteburua oparoa izan zen Eibar Igerixan taldearentzat. Martxoaren 28an eta 29an, Tolosako Usabal kiroldegian jokatutako Gipuzkoako Kluben Kopan, eibartarrek hirugarren postua eskuratu zuten sailkapen orokorrean, lan sendo eta orekatua eginez.
Banakako probetan, hainbat igerilari nabarmendu ziren. Paula Calvok garaipen ugari lortu zituen estilo probetan, eta bigarren izan zen 50 librean. Ander Izaguirrek ere emaitza bikainak sinatu zituen, 50 eta 100 libre probetan irabazita eta beste hainbatetan podiumean sartuta. Iker Calvok, bere aldetik, lehen postua eskuratu zuen 50 bizkar proban, eta bigarren izan zen beste zenbait probatan.
Beste emaitza aipagarrien artean, Itsaso Castrillok bigarren postua lortu zuen 800 librean, Naroa Osak hirugarrena 100 bizkar proban eta Jokin Onekak hirugarrena 400 estilotan.
Erreleboetan ere maila handia erakutsi zuten mutilek, 4x50 eta 4x100 probetan hainbat bigarren eta hirugarren postu eskuratuz. Azkenean, emakumezkoen zein gizonezkoen taldeek laugarren postuan amaitu zuten, eta horri esker sailkapen orokorrean hirugarren tokira igo zen taldea.
Alebinak Bergaran
Bestalde, martxoaren 28an, Bergarako Agorrosin kiroldegian jokatutako Alebin Ligako seigarren jardunaldian ere parte hartu zuten Eibar Igerixaneko gaztetxoek. Alazne Avellaned, Maria Rodriguez, Gorka Castrillo, Paul del Rio, Unax Conde eta Ilyas Zaid aritu ziren lehian, guztiek emaitza txukunak lortuz.
Nabarmentzekoa da Gorka Castrilloren jarduna, bigarren izan baitzen 800 metro librean eta hirugarren 50 bizkar proban. Paul del Riok ere podiuma zapaldu zuen, hirugarren postua lortuta 100 librean.
4x100 estiloko erreleboan ere lan bikaina egin zuten, Gorka Castrillo, Maria Rodriguez, Paul del Rio eta Alazne Avellaned-ek osatutako taldeak laugarren postua eskuratuta.
