Eibar Igerixan taldeak emaitza bikainak lortu ditu Euskal Herriko Udako Txapelketan
Joan den asteburuan, uztailaren 4an eta 5ean, junior eta absolutu mailako Euskal Herriko Udako Txapelketa jokatu zen Gasteizko Mendizorrotzako igerilekuan. Eibar Igerixan taldeak zortzi igerilarirekin hartu zuen parte: Paula Calvo, Asier Gomez, Anes Abderrahamme, Ander Izaguirre, Jokin Oneka, Elaia Mujika, Itsaso Castrillo eta Naroa Osa.
Eibarko taldeak maila bikaina erakutsi zuen txapelketan zehar, domina ugari eta sailkapen aipagarriak lortuz. Nabarmendu beharrekoa izan zen Paula Calvoren jarduna. Igerilari eibartarrak urrezko domina eskuratu zuen junior eta absolutu mailan 100 metro librean, 200 metro estiloetan eta 50 metro bizkar probetan. Horrez gain, junior mailan txapeldun izan zen 50 metro tximeletan, eta absolutu mailan brontzezko domina irabazi zuen proba berean.
Jokin Onekak ere emaitza bikainak lortu zituen, junior mailako 400 metro estiloetan urrea eskuratuz eta absolutu mailan hirugarren postua lortuz.
Bestalde, Itsaso Castrillok zilarrezko domina irabazi zuen junior mailako 200 metro bizkar proban, eta brontzea 100 metro bizkarrean. Elaia Mujikak bi brontzezko domina gehitu zizkion taldearen uzta onari, junior mailako 200 eta 50 metro libreko probetan. Naroa Osak ere podiumera igotzea lortu zuen, junior mailako 100 metro bizkar proban hirugarren sailkatuta.
Taldeko emaitza onak osatzeko, Elaia Mujika, Itsaso Castrillo, Paula Calvo eta Naroa Osak osatutako 4x100 metro libreko errelebo taldeak laugarren postua eskuratu zuen.
Eibar Igerixanetik azaldu dutenez, lortutako emaitzak denboraldi osoan egindako lanaren fruitua dira, eta udako txapelketari amaiera ezin hobea eman diote.
