Eibar Igerixan taldekoek maila bikaina erakutsi zuten Ipuruan jokatutako Ligako jardunaldian

28 laguneko taldea aurkeztu zuen Eibarko igeriketa klubak Ipurua kiroldegian jokatutako Neguko Probintziako Ligaren bigarren jardunaldian, eta ia kopuru horretara iritsi zen Eibar Igerixanekoek guztira eskuratutako domina kopurua. 26 domina horietatik, gainera, gehienak -15- urrezkoak izan ziren, hau da, hamabost proba horietan gure herriko igerilari bat izan zen garaile. Federatuen mailakoak zortzi izan ziren parte hartzen (launa gizonezko zein emakumezko), eta beste hogeik eskola mailako probetan hartu zuten parte (11 neska eta bederatzi mutil).

Irabazleei dagokienez, federatuetan Paula Calvok hiru proba bereganatu zituen (400 estilo, 100 bizkar eta 50 tximeleta), Asier Gomezek bi (400 estilo eta 200 braza) eta Igor Ruizek 50 tximeletan nagusitu zen. Eskola mailako probetan, bestalde, hauek izan ziren irabazleak: Itsaso Castrillo bitan heldu zen lehen postuan (100 bizkar eta 50 tximeleta), Jokin Oneka garaile izan zen beste bitan (200 libre eta 50 tximeleta), Jon Guineak eskuak jaso zituen 50 libretan, Itziar Eirizek 50 bizkarrekoa irabazi zuen eta Julen Prietok 100 brazakoa. Erreleboetako probatan eskainitako maila ere ez zen nolanahikoa izan: federatuen mailan, 4x100 libreko proban, gizonezkoen laukotea nagusi izan zen eta emakumezkoenak bigarren amaitu zuen; eta eskola mailako 4x100 librekoan ere nesken bi laukoteek lehen eta bigarren postuetan amaitu zuten. Igerilari asko bildu zituen ekimenean “etxekoak” ondo erakutsi zuten etxe hori gordetzen.