Eibar Triatloi Taldeko Kristina Ruiz podiumera igo zen Lekeitioko Triatloian
Joan den larunbatean, ekainak 20, Euskal Herriko egutegiko hitzordu garrantzitsuenetako bat jokatu zen: XXXIII. Lekeitioko Triatloia. Urtero bezala, parte-hartzaile ugari erakarri zituen probak, zirkuitu erakargarriari eta sortzen duen giro bikainari esker. Eguraldi beroa espero bazen ere, lasterketa 23 graduko giro-tenperaturarekin eta 21,9 graduko ur-tenperaturarekin abiatu zen. Guztira 370 triatletak hartu zuten parte.
Emakumezkoen proban, 16:30ean eman zitzaion hasiera lehiari. JAZ-Eibar Triatloi Taldeko Kristina Ruiz izan zen emaitzarik nabarmenena lortu zuena. Eibartarra hirugarren sailkatu zen V2F kategorian eta 33. postuan amaitu zuen sailkapen absolutuan, 1:21:17ko denborarekin. Taldekide Idoia Uruñuelak, berriz, 1:45:29ko marka egin zuen eta 61. postuan sailkatu zen.
Hamabost minutu geroago abiatu ziren gizonezkoak. Taldeko lehen ordezkaria Jokin Amorrosta izan zen, 1:08:43ko denborarekin 60. postuan helmugaratuta. Ondoren iritsi ziren Aitor Fernández (1:15:45 eta 134. postua), Roberto Gartzia (1:16:38 eta 147. postua), Javi Muñoz (1:23:50 eta 203. postua), Txus Sánchez (1:37:44 eta 235. postua) eta Alberto Agirre (1:38:42 eta 236. postua).
Bestalde, Berrizen jokatutako V. Amaraune Mendi Lasterketan ere izan zuen ordezkaritza talde eibartarrak. Bertan, Nerea Ziaranek 12 kilometroko proban hartu zuen parte eta 1:34:32ko denborarekin helmugaratu zen, sailkapen nagusian 37. postua eskuratuz.
