Eibarko Elkarrekin Podemos-ek 21 zuzenketa aurkeztu dizkio 2026ko udal aurrekontuari
Eibarko Elkarrekin Podemos-ek 21 zuzenketa aurkeztu dizkio 2026ko udal aurrekontuen proiektuari, helburu honekin: “Zerbitzu publikoak indartu, jasangarritasunean aurrera egin, eta herritarrek erabakitzeko espazio berriak zabaltzea”. Proposamenek, guztira, 3,8 milioi euroko kopurua gainditzen dute. Ardatz nagusien artean, funtsezko zerbitzuak berriz ere Udalaren ardurapekoak (azpikontratatuta izan beharrean) izatearen aldeko apustua nabarmentzen da. Zuzenketa batek eraikin publikoen eta hiri-altzarien garbiketa-zerbitzua berreskuratzea planteatzen du, gaur egun kanporatuta dagoena, 2,28 milioi euroko aurrekontuarekin. Eta, beste batek, Etxez Etxeko Laguntza Zerbitzua (SAD) osorik eta modu publikoan kudeatzea proposatzen du, 1,54 milioi euroko diru-partidarekin.
Isabel Fernandez Pejenaute Elkarrekin Podemos-en bozeramailearen berbetan, “azpikontratatzioak lan-prekarietatea sortu du. Zerbitzu hauek %100ean udalarenak bihurtzeko une egokia da”.
Koalizioak herritarren parte-hartzea ere indartu nahi du, aurrekontu parte-hartzaileak 400.000 euroko partida batekin berreskuratuta, eta prozesu espezifikoak sortuta: bat El Corte Ingles-ak bete zuen eraikinaren etorkizuna lantzeko, eta beste bat Eibarko gazteriaren aisialdi-beharrak ezagutzeko.
Etxebizitzari dagokionez, Elkarrekin Podemos-ek 350.000 euro gordetzea proposatzen du, “babes ofizialeko etxebizitzen gaineko lehenespen-eskubidea erabiltzeko, eta udal etxebizitza-parke baterantz aurrera egiteko”.
Zuzenketa-multzoak, gainera, ingurumen eta trantsizio ekologikoko hainbat neurri jasotzen ditu: eukaliptoaren hedapena gelditzeko landa-lurrak erostea; bertako espezieen landaketa bultzatzea dirulaguntzen bidez; polinizatzaileak kontserbatzeko plan bat; baratze urbanoetarako udal lur-banku bat sortzea; edo birziklatze-makinak saridun jartzea. Fernandez Pejenautek azpimarratu duenez, “ekosistemak babesteko eta eredua jasangarriagoa izateko politika ausartak behar dira. Ezin dugu beste alde batera begiratzen jarraitu”.
Elkarrekin Podemos-ek herritarren egunerokoa hobetzeko proposamenak egin ditu, baita ere: haurtxoentzako pixoihal-aldagailuak parke eta komun publikoetan jartzea; txakurrentzako jolas-parke bat sortzea; haurrentzat estalitako parkeak egitea —San Andres ikastetxearen ondoan dagoen parkean eta Sansaburuko patioan, adibidez—; eta Coliseorako sarrerak erosteko makina bat Portalean jartzea.
Arlo teknologikoan, taldeak 150.000 euro bideratzea proposatzen du hiri osoa hartuko duen abiadura handiko zuntz optikoko sare baten lehen fasea garatzeko, baita Udalean software librea erabiltzeko bidean aurrera egiteko azterlan bat ere.
Zuzenketa zuzenak finantzatzeko, taldeak hainbat partida ezabatzea edo murriztea planteatzen du, “baita ere finantza-pasiboen bidez diru-sarrera gehiago lortzea”, Udal Gobernuak aurkeztutako proiektuan “oposizioarentzat benetako tarterik ez” dagoela argudiatuta.
Fernandez Pejenauteren arabera, proposamen-multzoak “tokian bertan antzemandako beharrizanei eta hiri-eredu argi bati erantzuten die: bidezkoagoa, parte-hartzaileagoa eta iraunkorragoa”.
