ELA duten gaixoen alde, “Los olivos pálidos” antzezlana eskainiko dute domekan Coliseo antzokian

Apirilaren 14an (domeka), 12:30ean, Eibarko La Red Teatro taldeak 'Los Olivos Pálidos' muntaia antzeztuko du Coliseo Antzokian. Ikuskizun horrek helburu solidarioa izango du, bildutako dirua Gipuzkoan ELA gaixotasuna daukatenei emango baitzaie. Eibarko Udalaren eta ADELA-Gipuzkoa elkartearen laguntzarekin, sarrerek 10 euroko prezioa izango dute, dohaintza gisa.

Sarrerak egunean bertan eskura daitezke, eta baita aldez aurretik  ere Eibarko Klub Deportiboan edo ADELA-Gipuzkoako 679234059 telefonora deituta.

Mikel Areitioaurtenaren zuzendaritzapean, eszenatokian Maite Lorenzo, Juanma Cano, Nerea Ariznabarreta eta Enrique 'El Vaca' gitarra-jole flamenkoa izango dira. Argiztapena, berriz, Juanjo Pérezen lana da. Umorea, drama, antzerkia, poesia eta zuzeneko musika uztartzen dituen ikuskizun hau Eibarren estreinatu zen eta ondoren Ermuan, Bilbon, Gasteizen, Amurrion, Miteu de Ourense erakustaldian, Soraluzen, Iurretan eta Arnedon ikusi ahal izan da.