Etxeetako lapurretak eta sexu-askatasunaren aurkako delituak gutxitu dira Eibarren

Etxeetako lapurretak eta sexu-askatasunaren aurkako delituak gutxitu egin dira Eibarren 2026ko lehen zortzi hilabeteetan, aurreko urteko epe berarekin alderatuta. Ertzaintzaren behin-behineko datuen arabera, 33 etxe-lapurreta erregistratu zituzten 2025eko urtarriletik abuztura, eta 22 aurtengo epe berean.

Enpresetako lapurretak ere gutxitu egin dira: bost izan ziren iaz, eta bi aurten. Espazio itxietako lapurretak, berriz, 73tik 25era jaitsi dira. Sexu-askatasunaren aurkako delituak hamar izan ziren 2025eko lehen zortzi hilabeteetan, eta lau 2026ko epe berean. Gaueko aisialdiarekin lotutako lesio eta borroka larrien kasuak ere gutxitu dira, hamabitik zazpira.

Jon Iraola Eibarko alkateak bilakaera positibotzat jo ditu datuak, baina zuhurtziaz jokatu behar dela eta prebentzio-lanarekin jarraitu behar dela adierazi du. Udalaren arabera, Udaltzaingoaren eta Ertzaintzaren arteko koordinazioak eta delituak behin eta berriro egiten dituzten pertsonen aurkako jarduketek lagundu dute bilakaera horretan.

Segurtasun-kamera berriak

Eibarko Udalak jakinarazi du datozen egunotan trafikoa eta segurtasuna zaintzeko kamera berriak jarriko dituela. Udalaren esanetan, kamerak delituak prebenitzeko eta argitzeko erabiliko dituzte, baita arau-hauste administratibo batzuk hautemateko ere, indarreko lege-esparruaren barruan.

Udaltzaingoak Ertzaintzarekin elkarlanean egindako operatiboekin jarraituko du. Horrez gain, udalak auzozainen ekimena nabarmendu du. Joan den apirilean jarri zuten abian, Udaltzaingoa herritarrengana hurbiltzeko eta auzotarren eskaerak, kexak eta iradokizunak jasotzeko.