Euskaraldia ON! Euskal Herri mailako topaketa egingo da eguenean Eibarren

2025eko maiatzaren 15etik 25era EUSKARALDIA izango dugu, hizkuntza ohiturak aldatzeko ariketa soziala. Oraindik hilabete batzuk falta badira ere, irailaren 26an, osteguna, Eibarren Euskaraldia ON! topaketa irekia egingo da Euskal Herriko euskaltzaleekin, teknikariekin... lehen urratsak emateko. Ekitaldia Eibarko Coliseo antzokian izango da, 18:00etatik 19:30era, eta Eibarren AKEBAIk oharra bidali die bazkideei bertaratzeko gonbidapena eginez.

Euskaraldiatik azaldu dutenez, "Eibarkoa, ez da ohiko bilkura izango. Euskararen erabilera bultzatu nahi dugun euskaltzaleon bilgunea izatea nahi dugu, Kezkak eta ideiak partekatzeko, baina, batez ere, aldaketa posible dela sinesteko; tarteka bidean galtzen ditugun indarrak berreskuratzeko. Eta herri/auzoetan erabilgarriak izan daitezkeen ideiak eta tresna praktikoak eskuratzeko. Gainera, topaketan herrien izen ematea zabalduko dugu".