Euskararen Nazioarteko Eguna ospatuko dugu bihar
Bihar, abenduak 3, Euskararen Nazioarteko Eguna izango da eta Eibarko Euskalgintza osatzen duten taldeek hainbat ekintza antolatu dituzte eguna ospatzeko: batetik, Mintzodromoa hartuko du Untzaga plazak 18:00etatik aurrera. Herritar guztiei irekita dago baina aldez aurretik izena emanda eduki behar da; eta, bestetik, 19:00etan ekingo zaio eguneko ekintza nagusiari Ixotu euskeria! Ez dein argixa emetau! goiburu hartuta. Edozein argi mota ekartzea eskatu dute antolatzaileek, "linterna, frontala... argia ematen duen edozer ekar daiteke, denon artean argia emango diogu gure hizkuntzari eta ozen aldarrikatuko dugu Eibarren euskaraz bizi nahi dugula". Koreografia erraza prestatu dute Kaxakoek eta hori da harmailetan egingo dena: "Koreografiarekin bideoa prestatu dugu, hala nahi duenak ensaiatu dezan, baina ensaiatu ez duena ere etor daiteke lasai asko, erraza da-eta". Hortxe, beraz, hitzordua Eibarko euskaltzale guztientzako, "bihar, abenduak 3, Euskararen Eguna ospatu eta euskaraz bizi nahi dugula aldarrikatzeko eguna izango da".
