Gaur hasiko da ahots maratoia Eibarren

Egungo teknologiak testuzko eta ahozko datu masa erraldoiak eskatzen ditu, eta, euskararen presentzia eremu digitalean bermatzeko, Gaitu izeneko kanpaina abiatu zen urrian, makinei eta teknologia berriei euskara irakasteko. “Batu ditzagun gure ahotsak” lelopean, abenduaren 3a bitartean hainbat herritan egingo dira esaldi grabaketa maratoiak,  ahots maratoiak, hain zuen ere. Eibartarron kasuan, erronka bi egunetan 12.500 esaldi grabatzea da eta Akebairen guardasolpean antolatutako ekimen honetan hainbat eragilek hartuko dute parte.  Gaur (hilak 1), 18:00etatik 21:00etara Errebalen eta bihar, abenduaren 2an, 11:00etatik 14:00etara Untzagan (harmailen aldean).

Ordenagailuak eta kaskoak ipiniko dira herritarren esku eta argibideak eta laguntza ematen euskalgintzako hainbat lagun arituko dira. Norberaren eskuko telefonoa erabilita ere oso erraza da grabaketak egin eta parte hartzea, eta horretarako aukera eta laguntza ere eskainiko da. Erronkaren betetze maila neurtzeko liburutxo bat egongo da egun bietan, herritarren izena, adina eta grabatutako esaldi kopurua jasotzeko. Parte hartu nahi dutenak edozein momentutan hurbildu daitezke aipatutako lekuetara.

Erronka berri baten aurrean gaude euskaldunok: makinek gure hizkuntza ulertu eta hitz egin dezaten, lehenik irakatsi egin behar zaio. XXI.mendean sartuta gaude honezkero eta euskarak ezin du museoko hizkuntza bat izan, teknologiarako ere prestatua dagoen hizkuntza izan behar du.

Edozein arrazoi dela eta egun horietan parte hartzeko aukerarik ez duenak edota bere kabuz egitea nahiago duenak BIDEO honetan aurkituko ditu jarraibideak: