Gaur paleta goma partidua Astelenan, bihar esku pilotako lau partidu
Gaur Gipuzkoako Txapelketako paleta goma partidua izango da Astelena frontoian, arratsaldeko 20:30ean hasiko da norgehiagokan. Zazpigarren jardunaldiari dagokion partiduan, Eibarko Lombraña-Osa-Urain taldeko bikoteak Lasarteko Intza klubeko bikotea izango du aurrez aurre.
Bestalde, probintziako txapelketetako lau partidu hartuko ditu Astelena frontoiak biharko jaialdian: euretako bi banakako txapelketari dagozkionak, eta ondorengo biak binakako lehiaketakoak. Arratsaldeko 18:30ean abiatuko da programazioa, errendimendu mailako buruz-burukoekin. Bertan Eibarko bi ordezkarik Goierriko beste biri egingo diete aurre: Agotek, zaletuen animoak lagun dituela, Enriqueri egingo dio aurre, eta jarraian Colmenerok aprobetxatu nahiko du etxean jokatzen duela Lizarralderen kontrako partiduan.
Ondoren, Gipuzkoako binakako txapelketako final-laurdenetako ordua izango da, kadete eta helduen mailetako partiduekin. Gazteenen kasuan, orain arteko partidu guztiak irabazi dituen Varona-Gil bikotea aurrera egiten ahaleginduko da Oiartzungo Oiarpe 1 bikotearen aurrean. Eta amaitzeko, nagusien partiduan, lehenengo fase bikaina osatu eta gero, Ibarra-Agirresarobe Eibarko bikoteak Azpeitiko Ilunpe 1 taldeko bikotea garaitzen ahaleginduko da.
