Herri Txikiko beste txango bat egingo dute zapatu honetan Deporreko mendizaleek

Klub Deportiboko mendi batzordekoen hurrengo irteera datorren asteko zapatuan izango da, Herri Txikiko irteeren barruko Araia-Ziordia etaparekin; erdi bidean 1.118 metroko Arbarain gaina zapalduko dute. 15 kilometroko ibilbidea izango dute aurrean, gorantzako metatua 795 metrokoa izanik, eta behekoa 855 metrokoa. Goizeko 08:00etan irtengo da autobusa, betiko lez, eta arratsaldeko 17:30ean bueltatzea espero dute. Herri Txikikoen barrukoa izan zen azken irteera ere, joan zen zapatuan Otzaurtetik Araiara eraman ziena, eguraldi kaxkarrarekin, euria eta haizea protagonista bihurturik.

Bestalde, aurten sagardotegira joanez egingo duten txangoa otsailaren 22an burutuko dute, eta izena emateko epea zabaldu dute dagoeneko. Informazioa honako estekan aurkitu dezakezue.

Aldatu egin da, azkenik, Deporreko mendi batzordekoen bulegoko ordutegia eta, hemendik aurrera, martitzen eta eguenetan jarraituko du izaten, baina 19:00etatik 20:00etara izango duzue zalantzak argitzeko edo izena emateko aukera hori.