Hodei Ezpeleta etzi jokatuko den XXV. Urrezko Binakako Aizkolari Txapelketan arituko da
Gure herriko aizkolaria beste txapelketa garrantzitsu baten finalean izango da asteburuan, zehazki domekan Azpeitiko Izarraitz pilotalekuan jokatuko den XXV. Urrezko Binakako Aizkolari Txapelketan. Lehiaketa eguerdiko 12:00etan abiatuko da eta bertan izango dira txapelketa nagusi horretako finalerako sailkatutako hiru bikoteak. Aurretik jokatutako kanporaketetatik Hodei Ezpeletak eta Arkaitz Etxebestek osatuko dute bat, Julen Alberdi “Txikia IV”-k eta Jon Rekondok beste bat, eta Iker Vicentek eta Eneko Saralegik osatuko dute hirugarrena.
Ez da hori izango aizkolarien arteko lehia bakarra, beste hiru ere hartuko baititu jaialdiak: 23 urtetik beherakoan, Jon Erdozia, Jokin Larrieta eta Aritz Oiarbide arituko dira, nor baino nor; 19 urtetik beherakoen mailan, Kimetz Alzolak, Oier Mitxelenak eta Aitor Saralegik neurtuko dituzte indarrak; eta emakumezkoen mailan, Uxue Ansorregik, Laiene Pikabeak eta Karmele Gisasola “Zelai III”-k hartuko dute parte.
EITB-k zuzenean eskainiko duen ekitaldian Urrezko Harrijasotze Txapelketa ere jokatuko dute, hiru mailatan banatuta. Gizonezkoei dagokienez, Harri Handien mailan jardungo dute Gari Garmendia, Xabier Aranburu “Guzta” eta Jon Unanue “Goenatxo III”; eta Harri Txikienekin, Paulo Azpiazu, Iraitz Arruti “Burni Txiki” eta Mikel Lopetegi “Urra”. Emakumezkoen mailakoa ere jokatuko da, Estefi Etxebeste, Maddi Gesalaga eta Ainitze Zumeta protagonista izango dituena.
