Inda Team-eko borrokalariak K1 Slam jaialdian izan dira
Larunbatean, hilak 14, K1 Slam jaialdia jokatu zen Galdakaoko Urreta kiroldegian, eta bertan Inda Team taldeko bi borrokalari aritu ziren lehian, emaitza desberdinekin.
Sandra Rocha eibartarrak low kick modalitatean (-62,5 kg) egin zuen borroka, Indar Sport klubeko Marina Valverderen aurka. Neurketa oso parekatua izan zen, eta azken asaltoak erabaki zuen lehia. Azkenean, puntuetara Marina Valverde nagusitu zen, borroka estu eta lehiatuan.
Bestalde, John Nuñezek garaipena eskuratu zuen K1 modalitatean (-66 kg), Team Rabit klubeko Abel Cítoresen aurka. Puntuetara nagusitu zen Inda Team-eko borrokalaria, esperientzia eta prestakuntza sendoa baliatuta aurkari ausart baina gazteago baten aurrean.
Gainera, neurketa honek hurrengo erronkari begirako prestaketa gisa balio izan dio Nuñezi: otsailaren 28an, Aiako probalekuan, Kuraia Martutene klubeko Xabi Gasolen aurka arituko da K1 modalitatean, beste borroka ikusgarri batean.
