Ipuruako gimnastek Azkoitian eta Castron lehiatuko dute asteburuan

Nahia eta Haizeder Arguiz, Naroa Alonso, Arrate Bascaran eta Ane San Martin senior mailako gimnastek bihar Azkoitian jokatuko den Gipuzkoako banakako txapelketan hartuko dute parte eta domekan Castro Urdialeseko torneora joango dira.

Bestalde, Ipuruako amateurrek eta eskolarrek nota onarekin gainditu dituzte Gipuzkoako Federazioak antolatu dituen kanporaketa faseak. Aurreko asteburuan Donostian jokatutako eskola mailako bigarren fasean, eibartarrek lau talde alebin eta infantil bat sailkatu dituzte finalerako, baita banakako modalitateko bi gimnasta eta taldekako banakakoan parte hartuko duten 10 gimnasta ere. Guzti horiek maiatzaren 10ean Irunen jokatuko diren Gipuzkoako Eskolarteko Txapelketan lehiatuko dute. Aurreko asteburuan Ibarran jokatutako amateurren  bigarren fasean ere, banakako modalitatean parte hartu zuten hiru taldek eta 13 gimnastek, guztiek txartela lortu zuten maiatzaren 17an hemen, Eibarren, jokatuko den finalerako.

Bestalde, kadete mailako Oinarrizko taldeak Marbellako Grand Prix nazioarteko txapelketan hartu zuen parte. Estatu mailako Koparako prestaketa fasean daude, sailkapen kontrola gainditu ondoren, eta klubeko federatu gazteenentzat esperientzia aberasgarria izan zen, txapelketa horrek maila handiko gimnastak biltzen dituelako.