IV. Eibarko Txakurkrosa giro bikainean jokatu zen aurreko domekan

IV. Eibarko Txakurkrosa giro bikainean jokatu zen aurreko domekan
2024/01/16 eta kitto!
Modalitatearen beste proba batzuekin koinziditzerakoan aurreko edizioetan baino parte-hartzaile gutxiagorekin izan bazen ere, domeka goizean jokatutako gure herriko txakurkrosaren IV. edizioa arrakastatsua izan zen. Bertan, gainera, Andoni Mayo eibartarrak hirugarren postuan amaitu zuen bikejoring proban eta postu bera eskuratu zuen Nagore Angiozarrek herri-lasterketako proban. Hori bai, Arratekoa antolatu zuten Amarok taldeko ordezkariak nagusitu ziren jokatutako lasterketetan.

Euskadiko Txakurkros Ligako proba nagusian Iñaki Rodriguez eta Olatz Zabala izan ziren garaileak. Lehenengoak, Ika txakurra lagun zuela, 34 minutu eta 3 segundo behar izan zituen ibilbidea osatzen zuten 9 kilometroak egiteko; Olatz Zabalak, bestalde, 41 minutu eta 59 segundo behar izan zituen. Arraten hasi eta amaitu zen proban -hori bai, Kalamuatik pasatuta-, Lander Parrak (38:22) eta Xabier Agirrek (39:21) osatu zuten podium bat, eta Maite Sanchezek (44:13) eta Aida Maria Malesek (45:34) bestea.

Aurretik jokatutako bikejorin modalitatekoan, hau da, bizikleta gainekoan, Ekaitz Erauskin eta “Turbo” izan ziren onenak (19:51), Xabier Diliz bigarrena minutu erdira helmugaratuz. Proba horretan Andoni Mayo eta “Dexter” hirugarren izan ziren 7 kilometroko proba gogor horretan. Azkenik jokatutako herri mailakoak bakarrik 2 kilometro izan zituen eta Olabeko zelaian jokatu zen. Hor Oier Sanchez izan zen onena gizonezkoetan, David Cabrero eta Yeray Peredaren aurretik; emakumezkoetan, berriz, Naiara Mujikak, Malen Amuategik eta lehen aipatutako Nagore Angiozarrek osatu zuten podiuma.