Jardunaldi Mikologikoen 24. edizioa egingo da asteburu honetan

Errebal Plazia izango dute kokagune Jardunaldi horietako lehen bi egunak, bihar eta etzi. Ohi bezala, zapatuan haurren mendi irteera egingo dute onddoak biltzeko, baina bilaketa hori oraingoan Eibar inguruan izango da, horrela “inguruak ezagutuz eta ikasturteko lehenengo mendi buelta egiez”. Jarraian, 11:00etatik aurrera, aukera egongo da perretxikoak Errebal Plazara eramateko, bertako A eta B gelatan sailkatzeko, Aranzadiko adituen laguntzarekin: “Aurten izaera irekiagoa eman nahi diogu saio honi eta Aranzadiko adituek prest egongo dira nahi duten guztiei edozein galdera edo zalantza erantzuteko, dela jangarritasunari buruz, dela beste edozein gairi buruz”.

Domekan, Errebal Plazan bertan, bildutako aleen erakusketa eta txanpien dastaketa uztartuko dira. Goizeko 10:30etik aurrera hasiko da egun horretako erakusketa eta ondorengo dastaketa saioa 14:00ak inguruan amaituko da.

Astelehena egitarauko azken eguna izango da eta hor kokagunea aldatuko dute, Eibarko Klub Deportiboko egoitzara pasatuz. Bertan hitzaldia eskainiko du Pedro Arrillaga Aranzadi Zientzia Elkarteko ordezkariak 19:00etatik aurrera.