“Komunikazioa eta gardentasuna administrazio publikoetan” jardunaldia antolatu du Udalak azaroaren 23rako

Lehen edizioak izan zuen harrera ona ikusita, “Komunikazioa eta Gardentasuna administrazio publikoetan” izeneko jardunaldia antolatu du bigarrenez Udalak, “administrazio publikoek komunikazioaren eta gardentasunaren alorrean egin duten lana ezagutzera eman eta era guztietako erakunde publikoentzat soluzioak proposatzeko” asmoz. Azaroaren 23an izango da, Coliseon, 09:00etatik 13:45era. Bertan parte hartu nahi dutenek izena eman beharko dute aldez aurretik, gaurtik hasita azaroaren 16ra bitartean, www.eibar.eus udal-webgunean eskuragarri dagoen formularioa beteta (izen-ematea doan da). Jardunaldia streaming bidez ere ikusi ahal izango da, Udalaren YouTube kanalaren bidez.

Guztira sei hitzaldi eta mahai-inguru bat egingo dituzte, alorrean adituak diren hainbat profesionalen eskutik: Oscar Cortes Abad (Madrilgo Udaleko komunikazio digitaleko koordinatzailea eta Juan Carlos Erregea Unibertsitateko irakaslea), Malen Illarramendi Beitia eta Jone Amonarriz Zubeldia (AZK komunikazio-agentzia), Arantxa Hernandez Lopez (web-orrien irisgarritasunean aditua), Iñaki Gorostiza Esquerdeiro (LIN3S-ko Data Analytics-eko bazkide eta zuzendaria), Goizeder Manotas Rueda (Foru Aldundiko Gobernantza Departamentuko aholkularia) eta Haritz Ugarte Aizpuru (Berrikuntza eta Eraldaketa Zerbitzuko burua), eta Koldobike Uriarte Ruiz de Eguino (Eusko Jaurlaritzako Berrikuntza Publikoko Proiektuen arduradun eta Informazio Publikoaren Sarbiderako Euskal Batzordeko kidea).

Jardunaldian, besteak beste, honako gai hauek landuko dira: komunikazio digitala, krisi-egoeren komunikazioa, marka-irudia, webguneen irisgarritasuna, analitika digitala, gobernu ona, gardentasun aktibo eta pasiboa, eta salaketa-kanalak. Ekitaldia sektore publikoko komunikazio-arloko profesionalei eta, oro har, administrazio publikoko langileei dago zuzendua, bai eta komunikazio instituzionalean eta marketinean aditu direnei, komunikazio, kazetaritza edo antzeko graduko ikasleei, edo gaian interesa duten komunikabideei ere. Jardunaldia elebidun izango da, baina entzule guztien hizkuntza eskubideak bermatzeko, aldibereko itzulpen zerbitzua eskainiko da.