Mek Eibar-eko lehen bi taldeek lau puntutik hiru eskuratu dituzte azken asteburuan
Zilarrezko Mailako partiduan, Eibar eta Kukullagaren arteko partidua 18-18ko berdinketarekin amaitu zen, hasieratik defentsak nagusi izango zirela argi ikusi zen norgehiagokan. Bi taldeek sendotasun handia erakutsi zuten atzean eta, ondorioz, erasoek ahalegin handia egin behar izan zuten gola sartzeko. Eibar ondo hasi zen, baloia patxadaz mugituz eta bukatzeko aukerarik onenak bilatuz. Defentsan oso sendo zeuden, aurkariaren 1x1ekoa ondo itxiz. 17. minutuan 7-5 alde izanda, dena kontrolpean zegoela zirudien. Hortik aurrera, ordea, erasoa deskonektatu egin zen. Pibote bikoitzarekin saiatu arren, ez zuten Kukullagari min egiteko modurik aurkitu. Kukullaga eraginkorragoa izan zen eta atsedenaldira 9-11 irabazten joan zen.
Bigarren zatiaren hasieran Eibarko neskek markagailuan atzetik joan ziren, baina Luciaren geldialdiak eta defentsa on batzuen ondoren, taldeak 16na berdintzea lortu zuen 22. minutuan. Hala ere, aukera bat alferrik galdu zuten aurretik jartzeko zelaian bat gehiago zeudenean. Azkenean, taldeak hilabete zail batean erabakigarria izan daitekeen puntu bat eskuratu zuen.
Gizonezkoak Utebon irabazle
Bestalde, gizonezkoen taldeak lan bikaina egin zuen etxetik kanpo Utebo 21-25 mendean hartuta. Jarraian lortzen duten hirugarren garaipena da eta igoera lortzeko faboritoengandik gertu mantentzen ditu. Arrakasta defentsa lan sendo batean oinarritu zen, Utebo 21 goletan utziz. Mikel Zuloaga izan zen golegile nagusia, 11 tantorekin, eta Alex Puentek 6 sartu zituen. Sei jardunaldi jokatuta, bosgarren postuan dago Eibar. Defentsei dagokienez, gol gutxien jaso duen bigarren taldea da (144 gol kontra), eta erasoan gol gehien sartu dituzten lau taldeen artean daude (174 guztira).
