Mek Eibar Eskubaloiko taldeek Euskal Kopari ekin diote dagoeneko

Aurreko zapatuan eskubaloiko maila handiko bi neurketa hartu zituen Ipurua kiroldegiak; hori bai, Mek Eibarko bi talde nagusien poza ez zen erabatekoa izan, gizonezkoenak irabazten zuen bitartean emakumezkoenak galdu egin zuelako berea. Euskal Koparen barruan, Fernando Fernandezek zuzentzen duen taldeak erraz irabazi zion 1. Nazional Mailan aurkari izango duen Ilcapo Hondarribia-Bidasoari (30-19), atsedenaldira 15-7 irabazten joan eta gero.

Emakumezkoen taldeak, bestalde, 17-20 galdu zuen Bera Berarekin, atsedenaldira 9-11koarekin erretiratu eta gero. Mek Eibarrek bigarren taldeko jokalariekin osatu zuen partidua jokatzeko zerrenda. Denboraldi berrirako, B taldetik nagusira pasatuko dira Garazi Kortabarria, Jone Aldai, Lucia Zubizarreta eta Irati San Martin.

Bihar gizonezkoen lehen taldeak Zumaian jokatuko du, Euskal Koparen barruan berriro ere, Nikol Pulpori bisita eginez 20:30etik aurrera. Emakumezkoen lehen taldeak, bestalde, domekan norgehiagoka izango du Zarautzen, bertako Aiala Zarautzi aurre eginez 13:00etatik aurrera.