MICEk ordezkatuko du Euskal Herria hizkuntza gutxituen ‘Eurovision’ moduko jaialdiaren finalean
Argiako Gorka Peñagarikano Goikoetxea kazetariak landu du artikulua eta Creative Commons BY-SA 4.0 lizentziari esker ekarri dugu gure webgunera.
2009an egin zen lehenbiziko topaketa Udinen, Italia ipar-ekialdean, Eslovakiarekin eta Austriarekin mugan. Bada han hizkuntza gutxitu bat, friuliera, 600.000 hiztun inguru dituena. Italiako Estatuak legez babestu egiten du hizkuntza, baina ez da inon ofizialki onartua. Horregatik, besteak beste UNESCOren arabera, arrisku maila altuan dago. Ikas daiteke friuliera, horretarako sortu zuten 1996an friuliera batua edo estandarra, eta badute irrati lokal bat, Radio Onde Furlane, hizkuntza minorizatu horrentzat erreferentea dena. 1980tik ari da antenan.
Irrati horrek antolatzen du Suns Europe jaialdia –Suns hitzak, friulieraz, "soinuak" esan nahi du–. Hasieran topaketa zena, orain musika jaialdi bizia da, 2015az geroztik. Festibalaren xedea da Europako hizkuntza minorizatuak bizi-bizirik daudela demostratzea, espresio sutsuak dituztela kulturalki, eta ez dela folklorea soilik: "Aniztasunak batzen duen Europa baten alde, Europa erreal eta integratu baten alde".
Aurten, urriaren 11tik 19ra egiten ari dira topaketak, betiko moduan Udine hirian, eta larunbatean egingo bada ere festibalaren final handia, Giovanni antzokian, aurreko egun guztietan kontzertu programazio zabala antolatu dute, baita literatura eta beste diziplina artistiko batzuk elkarbanatzeko topaketak ere. Euskaraz eta friulieraz gain, hizkuntza hauek entzun dira eta entzungo dira jaialdia amaitu bitartean: aromaniera, behe-saxoiera, erromantxera, faroera, gaelikoa eta katalana.
Euskal Herria ordezkatzen, Etxepare Institutuaren laguntzaz, Miren Narbaiza MICE ariko da larunbateko finalean. Bigarren kontzertua izango du; izan ere, lehenago, urriaren 17an, oholtzara igoko da. Niña Coyote eta Chico Tornado ere Udinen egon dira, jaialdiaren lehen asteburuan, bi emanalditan. Hemen programa.
