Pilota giro betea Astelenan eta kanpoan asteburu honetan
Aste honetako pilota jardunaldiak hitzordu ugari ekarriko ditu, bai Astelena frontoian, bai etxetik kanpo jokatuko duten Eibarko pilotarientzat ere. Ostegunean hasiko da kartelera, 21:00etan, Udaberri Txapelketako goma paletako binakako partidarekin. Bertan, Bartolome eta Sologaistua eibartarrek Astigarragako Mundarro klubeko bikotea hartuko dute aurkari Astelenan.
Ostiralean, berriz, eskuzko bi partida izango dira ikusgai Astelena frontoian, arratsaldeko 19:00etatik aurrera. Lehenengoan, Errendimendu mailako gazteek jokatuko dute, Gipuzkoako Binakako Txapelketako lehen faseko azken jardunaldian. Lizarralde eta Saez eibartarrek Zumarragako Beloki 2 bikotearen aurka neurtuko dituzte indarrak. Ondoren, Varona eta Del Rey jubenilek Udaberri Txapelketako hirugarren jardunaldia jokatuko dute, Bergarako bikotearen kontra.
Bestalde, hainbat pilotarik etxetik kanpo izango dituzte hitzorduak. Errendimenduko alebinetan, Acha eta Uriartek Bergaran jokatuko dute ostiralean, Gipuzkoako Binakako Txapelketako lehen faseko azken jardunaldian. Goma paletan, Eibarko Klub Deportiboko Guinea eta Lombraña Mutrikun ariko dira, eta Osa eta Urainek Errenterian jokatuko dute ostegunean.
Eskuzko modalitatean, Arrieta eta Lizarralde Errendimenduko infantilak Idiazabalen arituko dira Gipuzkoako Binakako Txapelketako azken jardunaldian. Senior mailan, Amuategi eta Landak Tolosako Beotibar frontoian jokatuko dute larunbat goizean, 10:00etan. Jubeniletan, Segurola eta Urkiaga bikoteak Beasaingo Antzizar pilotalekuan izango dute partida larunbat arratsaldean, 17:00etan.
Azkenik, paleta goma banakakoan, zazpigarren koadroaren barruan, Gisasola eibartarrak Zumarragako Egiburu izango du aurkari larunbat arratsaldean, Zumarragako Beloki pilotalekuan.
