SD Eibarrek hutsean berdindu du Cadizen hainbat zaletu armaginen aurrean
Gaizka Garitanoren Cadiz izan zuen arerio atzo iluntzean SD Eibarrek. Lehia parekatua jokatu zen Nueva Mirandillan eta talde bientzat hutsala izan zen berdinketarekin amaitu zen (0-0), biek ala biek igoera postuak urrutiago ikusten dituztelarik. Izan ere, andaluziarrak eta eibartarrak 45 punturekin daude sailkapenean, 12. eta 13. postuetan, hurrenez hurren, 6. Postuan dagoen Oviedorengandik bederatzi puntura.
Hain zuzen ere Asturiasko taldea izango da SD Eibarren hurrengo arerioa, zapatuan, 16:15ean, Ipuruan. Oviedok Veljko Paunovic entrenatzailea fitxatu berri du eta bere lehenengo partiduan garaipena eskuratu zuen Malagaren aurka. Beraz, azken denboraldian Eibar play-offean kaleratu zuen taldea etsai gogorra izango da Ipuruan.
Aipatzekoa da SD Eibarrek atzokoan jaso zuen babesa, asko izan zirelako astelehen batean talde eibartarraren partidua Cadizen bertatik bertara jarraitu zuten zaleak. Animorik ez zitzaien falta jokalari armaginei, baina ez zen nahikoa izan etxera garaipena ekartzeko.
