Urbat Urkotroniken emakumezkoek garaipena lortu dute Ligan, baina Kopan galdu egin dute

Asteburu oparoa izan dute Urbat Urkotronikeko taldeek, bai senior mailan eta baita harrobiko kategorietan ere. Eibartarrek hainbat garaipen garrantzitsu lortu dituzte eta, emaitzez gain, joko aldetik ere sentsazio oso onak utzi dituzte uretan.

Senior nesken taldeak garaipen sendoa eskuratu zuen 1. Euskal Herriko Ligan, etxean CD Larrainaren aurka 15-9 nagusituta. Hasieratik hartu zuten partidaren kontrola, erasoan erakutsitako eraginkortasunari eta defentsan egindako lan sendoari esker. Erritmo handiko neurketa jokatu zuten eibartarrek, eta markagailuan aldeari eutsiz garaipen argia ospatu ahal izan zuten zaleen aurrean.

Ligakoaz gain, Euskal Herriko Kopako neurketa ere jokatu zuen, kasu horretan Lauroren aurka, kanpoan, eta 22-13 galdu zuen. Hala ere, Urbateko jokalariek aurkari indartsu baten aurrean lehiakortasun handia erakutsi zuten eta azken unera arte borrokan jardun zuten, intentsitate handiko eta gol ugariko partidan.

Harrobiko taldeek ere protagonismo handia izan zuten asteburuko jardunaldian. Infantil mistoak garaipen ikusgarria lortu zuen Leioa WP Bren aurka, 9-19ko emaitzarekin. Eibartarrek partida oso serioa jokatu zuten, batez ere kontraerasoan erakutsitako abiadura eta ate aurrean izan zuten asmamena baliatuz. Taldeak nagusitasunez kontrolatu zuen neurketa eta joko maila bikaina erakutsi zuen.

Eskolarteko taldeak ere emaitza bikaina eskuratu zuen kanpoan, CN Easwim Txuri taldeari 1-6 irabazita. Klubeko gazteenek berriro erakutsi zuten lanerako gogoa eta konpromisoa, defentsan zein erasoan partida oso txukuna eginez.