Zapatuan "Koralito" abesbatzaren lehen aktuazioa hartuko du Ipuruako Merkatu Plazak

Zapatuan "Koralito" abesbatzaren lehen aktuazioa hartuko du Ipuruako Merkatu Plazak
2024/01/10 eta kitto!
Zapatuan, hilak 13, Ipurua auzoko ahotsak entzun ahal izango dira Ipuruako Merkatu Plazan. Izan ere,  orain dela zenbait hilabete bertan sortutako "Koralito" abesbatzak bere lehen kontzertua eskainiko du publikoaren aurrean. Ekitaldia eguerdiko 12:00etan hasiko da.

Ipurua auzoan ekimen parte-hartzaileak abian jartzeko asmoz sortutako auzo-abesbatza da Koralito. Jose Miguel Laskurainek zuzentzen du taldea eta berak azaldu dizkigu jardueraren nondik norakoak: "Helburua ekimena auzoko pertsonei irekitzea izan zen, adin-mugarik gabe. Orain, 10 urteko neskatoak daude, eta baita 70 urte inguruko helduak ere; beraz, adin-tarte zabala dago. Emakumeak zein gizonak daude, baina emakumeak dira gehien parte hartzen dutenak. Entseguak astean behin egiten ditugu eta irekiak eta doakoak dira. Zapatuan, gure lehen aktuazioarekin, taldearen aurkezpena egingo dugu".

Publikoak ere parte hartu ahal izango du zapatuko emanaldian. "Mundu guztia kantatzea da gure asmoa, koruan egon ala ez", dio Laskurainek. 10 bat abesti eskainiko dituzte: erdia  euskaraz, hiru gaztelaniaz eta bi  Afrikako hizkuntzetan. Auzotarrei eta herritarrei zapatu eguerdian Ipuruako Merkatu Plazara gerturatzeko deia egiten diete, "helburua kantuaren bitartez ondo pasatzea da-eta".