Barixakuan hasiko da ‘Debabarrena Gourmet’ ekimen gastronomikoaren hirugarren edizioa

Zazpi jatetxe, zazpi menu eta zazpi plater. Horixe da “Debabarrena Gourmet” ekimen gastronomikoaren aurtengo eskaintza. Hirugarren edizio honetan, apirilaren 10etik 30era bitartean, eskualdeko erreferentziazko jatetxeek menu berezi bana eskainiko dute 65 euroan. Helburua argia da: sukaldariak eta bertako produktuak balioan jartzea, eta plater bakoitzaren sorkuntza-prozesua erakustea.

Eibarko Baratze Gourmet, Elgoibarko Belaustegi, Debako Hiru Bistro eta Urgain, Mutrikuko Pikua, Mallabiko Trabakua Behekoa eta Itziarko Salegi jatetxeek parte hartuko dute ekimenean. Era berean, Unai Altuna, Josu Mugerza, Geaxi Uribarri, Nestor Pañuni, Luis Ángel Alburquerque, Tasio Fernández eta Imanol Mugerza sukaldari erreferenteek prestatuko dituzte platerak.

Debabarrena Turismoak bultzatutako ekimena da, Debabarreneko Klub Gastronomikoko sukaldariekin elkarlanean egina, eta Eusko Jaurlaritzaren, Gipuzkoako Foru Aldundiaren eta Euskadi Gastronomikaren babesa du. Antolatzaileen arabera, aurreko edizioetan bezala, sukaldarien talentua nabarmendu eta eskualdeko gastronomia aberatsa erakustea da helburua. Onddo salteatuak gorringo kuratua eta foie-espumaarekin edo zapo-takoak almejekin eta ilar-saltsarekin moduko platerak dastatzeko aukera izango da, besteak beste.

“Debabarrena Gourmet” menua zazpi platerek osatuko dute: aperitiboa, bi hasierako plater, bi plater nagusi (arraina eta haragia) eta bi postre. Menuak ogia, kafea eta edaria ere barne hartzen ditu. Aurten, gainera, Arabar Errioxako Valdelana upategiaren “EDER de Valdelana” ardo zuria eta gorria izango dira dastatzeko aukerakoak.

Proposamen guztiak debabarrenaturismo.com webgunean daude ikusgai. Menua dastatu nahi dutenek jatetxeetara deitu beharko dute aurrez erreserba egiteko, eta “Debabarrena Gourmet” menua eskatu.

Ardo dastaketak eta bisita gidatuak zozketan

Aurtengo edizioak zozketa bereziak ere izango ditu. Debabarrena Turismoaren eta Arabako Errioxako Ardoaren Ibilbidearen arteko lankidetzari esker, ekimenean parte hartzen dutenen artean hainbat sari banatuko dira: bi pertsonentzako 20 ardo-dastatze eta Euskal Kostaldeko Geoparkera bi lagunentzako bost bisita gidatu, 2026ko urria baino lehen egiteko.