Eibarko eta inguruko baserritarrek San Isidro eguna ospatuko dute bihar Arraten

Bihar, maiatzak 15, San Isidro eguna ospatuko da Arraten. Urtero bezala, baserritarren babeslearen omenezko egitaraua antolatu dute, Eibarko eta inguruko baserritarrek jai-egunaz gozatzeko: 11:00etan meza ospatuko dute, santutegian, eta ondoren prozesioa egingo da. Jarraian, XXII. Aizkolari Txapelketa jokatzen hasiko dira: Jesus Mari Mujika eta Hodei Ezpeleta arituko dira aizkoran, eta tarteka Estefania Etxebestek harria altxatzen jardungo du.
Arratera joan nahi dutenentzat autobusa egongo dela jakinarazi dute Udaletik: San Juan kaletik irtengo da, 10:15ean, eta Arratetik Eibarrera jeisteko autobusa, berriz, 13:45ean izango da.