Maltzaga eta Soraluze arteko bidegorriaren proiektua idazteko lizitazioa egingo du Aldundiak
Gipuzkoako Foru Aldundiako Jasangarritasun Sailak datozen asteetan lizitatuko du Maltzaga eta Soraluze arteko bidegorriaren proiektua idaztea. Hala iragarri dute gaur, martxoaren 9an, Jose Ignacio Asensio Jasangarritasuneko diputatuak, Jon Iraola Eibarko alkateak eta Unai Larreategi Soraluzeko alkateak egindako agerraldian. Asensioren arabera, proiektuak Debabarrena eta Debagoiena eskualdeen arteko behin betiko lotura estrategiko eta segurua ahalbidetuko du.
Proiektuak bidegorriaren behin betiko ibilbidea, epeak eta egikaritze-aurrekontua zehaztuko ditu. Izan ere, Maltzaga eta Soraluze arteko zatia da oraindik egiteke dagoen bakarra Debabarrena eta Debagoiena oinezkoentzako eta bizikletentzako bide baten bidez lotzeko. Arduradunen arabera, azpiegitura horrekin erantzuna emango zaio eskualdean aspaldidanik egiten ari zen eskari bati.
Jasangarritasun Sailak adierazi du proiektuaren idazketa urte honetan bertan amaitzeko asmoa duela, eta lanak 2027an hastea aurreikusten duela.
Agintariek azaldu dutenez, trazadura tekniko aldetik konplexua izango da: zenbait tokitan mendi-hegaletatik igaro beharko du, egungo azpiegituren ondotik, eta baldintza hidrauliko eta bideko bereziak dituzten eremuetatik. Horregatik, proiektuak ahalik eta loturarik egokiena zehaztu beharko du, segurtasuna, ingurumen-integrazioa eta ibilbidearen jarraitutasuna bermatzeko.
