Pirinioetako zeharkaldiarekin amaitu du denboraldiko lehen zatia Klub Deportiboko Mendi Batzordeak
Eibarko Klub Deportiboko Mendi Batzordeak amaiera eman dio mendizaleen egutegiaren lehen zatiari joan den asteburuan, uztailaren 18an eta 19an, Pirinioetara egindako irteerarekin. Elgoibarko Morkaiko mendi taldearekin elkarlanean antolatutako zeharkaldiak 21 mendizale bildu zituen, eta udako oporren aurreko azken jarduera izan zen.
Bi eguneko ibilbidea zeharkaldi formatuan egin zuten parte-hartzaileek. Horrek esan nahi du mendizale bakoitzak motxilan eraman behar izan zituela gaua mendiko aterpe batean igarotzeko beharrezkoak ziren gauza guztiak. Antolatzaileen esanetan, klubek urtean antolatzen dituzten irteerarik zorrotzenetako bat da, 3.000 metro inguruko gailurrak, lur harritsuak eta desnibel handiak uztartzen baititu.
Lehen jardunaldian, larunbatean, Pont d'Espagnetik abiatu zen taldea. Bidean Pic Arrouy (2.781 metro) gailurra igo zuten eta, 15,7 kilometroko ibilbidea eta 962 metroko desnibel metatua osatu ondoren, Wallongo aterpean egin zuten gaua.
Igandean, berriz, Wallongo aterpetik abiatu eta irteerako unerik ikusgarrienetako bati egin zioten aurre: Gran Facha (3.011 metro) gailurrera igo ziren, handik Baños de Panticosara jaisteko. Bigarren etapako ibilbideak 17 kilometro eta 2.683 metroko desnibel metatua izan zituen.
Eguraldiak ere lagundu zuen asteburuan. Egun argiak eta beroak izan zituzten, eta horri esker Pirinioetako goi mendiko paisaiez eta ibilbide ikusgarriaz gozatzeko aukera izan zuten.
Irteera honekin amaitu da Mendi Batzordearen jardueren lehen zatia. Hala ere, irailean ekingo diote berriro egitarauari, eta ordurako hainbat hitzordu dituzte prestatuta. Besteak beste, Trabuko Bidera, Hartzaren Pasabideetara, Pirinioetara eta Redes Parke Naturalera egingo dituzten irteerak izango dira, baita haitzulo batera antolatutako txangoa ere.
