Antzerki Jardunaldiek beste bi lan hartuko dituzte asteburuan
Biharkoan Errioxako La Garnacaha Teatro konpainiak “Mujeres, teatro a la carta” eskainiko du Coliseon, arratsaldeko 19:00etan hasita. Vicente Cuadradok zuzendutako ordu eta erdiko draman Maria Jose Pascual, Rebeca de Apellanis, Megan Duval eta Vicente Cuadrado antzezleek hartuko dute parte. Menu dramatiko gisa pentsatuta, ikuskizunak 12 bakarrizketa ditu, eta protagonistak hiru aktore izango dira, historiako emakume garrantzitsuen papera egingo dutenak. Postre gisa, pieza labur bat antzeztuko dute, Henrike VIII.aren hiru emazte gorpuzteko. Ikuskizun liluragarri bezain konplexua.
Etzi, bestalde, Gipuzkoako Kamikaz Kolektiboak “Renata” 75 minutuko komedia eskainiko du, kasu horretan Uni-Eibar Hezkuntza Esparruan, eta ordu berean, hau da, 19:00etan. Ikuskizun hori martxoaren 16rako zegoen iragarrita, baina txarto ulertze bat tarteko, domeka honetara atzeratu behar izan zuten. Kolektiboa osatzen duen laukoteak zuzendu eta interpretatzen du lana: Erika Olaizola, Iraia Elias, Amancay Gaztañaga eta Xanti Agirrezabala izango dira oholtza gainean. Konpainia gazte honen obra berri bat, umorea eta absurdua beste leku batzuetara iristeko bide bezala erabiliz. Renata hil eta berpiztu egin da; etengabe hil eta berpizten da, azken astean 115 aldiz. Ezezaguna komunitate zientifikoarentzat; Jainkoa beste askorentzat. Zast, eta bizitzara itzuliko da.
