Esgrima historikoaren erakustaldia egongo da irailaren 28an Untzagan
"Museoko ertz zorrotzak" erakusketaren harira, Eibarko Armagintzaren Museoak esgrima historikoaren erakustaldia antolatu du irailaren 28rako. Erakustaldia eguerdiko 12:00etan izango da Untzagak plazan, eta horretarako Armagintzaren Museoan martxan dagoen aldi baterako erakusketako ezpaten erreplikak erabiliko dituzte. Museoko arduradunek azaldu dutenez, "erakustaldian Donostiako Ignota Arma Aretoko kideen eta Gasteizko CSE Esgrima Klubaren laguntza izango dugu eta ziur gaude erakustaldi bikaina, ezinhobea izango dugula". Eguraldi txarra izanez gero, Errebal plazan izango litzateke.
Bestetik, eta arratsaldeko 17:00etan, Armagintza Museoan ezpaten aldi baterako erakusketari buruzko doako bisita gidatua eskainiko du ezpatetan aditu den Iker Alejok.
