Euskaraldirako berotzen, hasi da ariketa sozialerako atzerako kontaketa

Maiatzaren 15etik 25era egingo da Euskaraldiaren 4. edizioa. Hilabete eta erdi falta bada ere, Bulego taldeak ekimen horretarako sortu duen abestiarekin lotura eginez, gure bihotzaren taupadak bizkortzen hasi dira ariketa horretarako prestatzen. Dagoeneko, Eibarren osatu da Euskaraldiaren Hamaikakoa eta zabalik dago izena emateko epea, izan Ahobizi, Belarriprest edo entitate bezala aritu.

Euskaraldia euskara ulertzen duten hiztunen hizkuntza-ohiturak aldatzeko jaio zen 2018an. 11 eguneko praktika sozial masibo baten bidez eta eguneroko harremanetan euskara lehenetsiz, herritarren hizkuntza-praktika aktibatzea eta euskararen erabilera handitzea nahi zen. Harrezkero, beste bi edizio egin dira, 2020an eta 2022an, denak azaroan hasita eta Euskararen Egunaren (abenduak 3) inguruan amaituta. 4. edizioa, ostera, udaberrian egingo da, eta helburuak berdina izaten jarraitzen duen arren, hauek zabaltzeko unea iritsi dela diote ekimenaren antolatzaileek: “Ez da soilik ariketa egun horietara mugatzen den dinamika, euskararen erabilera aktibatzeko mugimendua elikatu eta gizartean errotu nahi duen ekimena baizik”.

Horretarako, Euskal Herri osoan lan-taldeak martxan jarri dira, baita Eibarren ere. Hamaikakoak sortu dira, Euskal Herri osorako eta herri bakoitzean, eta hemen ere badugu gurea. Gure hamaikako horretako kide den Helene Otaduy eta berarekin eta Eibarren Akebai plataformako Arkaitz Urangarekin elkartu gara ariketa sozial horren inguruan gehiago jakiteko.

Aipatu bezala, edizio honetako berritasunik handiena data aldaketa izan da, hau da, udazkenean beharrean udaberrian egingo dela. Eta horrek nolako eragina izan dezake? “Eguraldiaren aldetik, ordu aldetik, argi aldetik… Horrek guztiak eragiten digu eta horrelako ariketa sozial bat egiterako orduan garrantzitsua iruditzen zitzaigun faktore horiek kontuan hartzea”, diosku Urangak. “Badirudi aldaketak erantzun positiboa diharduela izaten”.

Euskaraldiaren rolak

Euskaraldiko parte-hartzaileek bi rolen artean aukeratu beharko dute: Ahobizi edo Belarriprest. Edizio guztietan egon diren rolak dira, baina zalantzak argitze aldera, hona hemen rol bakoitzaren ezaugarrien azalpena:

Ahobiziak euskaraz ulertzen duten guztiekin euskaraz egiten du uneoro. Kideek euskaraz ulertzen ote duten ez dakienean lehen hitzak, beti, euskaraz egiten ditu; eta euskaraz ulertzen badute, euskaraz jarraitzen du.

Belarriprestak, ostera, aldiro erabakitzen du euskaraz noiz eta norekin egin. Agian, beti ez du euskaraz egingo ulertzen duten guztiekin, baina euskara dakitenek eurei euskaraz hitz egitea nahi du, eta horixe eskatzen die modu esplizituan.

Ahobizi edo Belarriprest moduan izena eman nahi izanez gero, hemen egin daiteke, rola aukeratu eta izapideak bete. Zentzu horretan, Urangak gauza bat laga nahi du argi: “Rol bakoitzak ez du zerikusirik hizkuntza gaitasunekin. Hau da, euskaldun oso eta funtzionala izan zaitezke eta euskaraz guztiz bizi, eta Belarriprest izatea erabaki. Rolak portaerari eragiten dio”.

Norbanakoez gain, ariketa soziala izanik, entitateek (elkarteek, enpresek, dendek, kirol taldeek…) ere hartu dezakete parte Euskaraldian. Horren bitartez, entitateetan ariguneak sortuko dira euskaraz lasai aritzeko, komunikazioak euskaraz egingo dira eta euskararen presentzia indartzeko beste neurri batzuk hartuko dira (hizkuntza harrera planak, barne politikak, eta abar).

Udalak jakinarazi duenez, Eibarko 40 entitatek baino gehiagok eman du izena eta, eurek egin bezala, bertan parte-hartzeko gonbidapena luzatu dute entitateak, webgune honen bitartez.

Herritarren parte-hartzea

Eibarko Euskaraldiaren enbaxadore izango diren hamaika kideak aurkeztu zituzten otsailean: Davide Cerchi, Jol Igartua, Aitor Muniozguren, Mohamed Fadel, Jon Alonso, Aresatz Usobiaga, Josune Garro, Simone Begiristain, Soko Baskaran, Najiba Benslaiman eta Helene Otaduy. “Adin eta profil ezberdineko lagunek osatzen dugu hamaikakoa, Eibarko ahalik eta publiko handienera heltzeko”, esan digu Otaduyk. “Gazte profila betetzen dut nik, eta nire inguruan eragitea da asmoa”.

Emozioz eta pozik hartu du hamaikakoko kide izatea eta gazteen artean Euskaraldian eragiteko gogoa dagoela aipatu digu. “Oraindik artikulatzen gabiltza, baina Gazte Asanblada sortu dugu, euskararen inguruko militantzian eta militantzian ez dabiltzanek ere Euskaraldiari alea jartzeko”, aipatu digu gazteak.

Entitateentzako eskaintza berezia  prestatu du ...eta kitto! Euskara Elkarteak

…eta kitto! Euskara Elkartean, Euskaraldian parte hartzeaz gain, hiriko entitate guztiak izena eman eta ariketa burutzera bultzatu nahi ditugu. Horregatik, Euskaraldian parte hartuko duten Eibarko entitateei (elkarte, enpresa, merkatari, taberna…), beraien partaidetza ezagutzera eman eta ...eta kitto! astekarian iragarri daitezen, eskaintza berezia prestatu diegu.

Eskaintzaren nondik norakoak ezagutzeko, publizitatea@etakitto.eus helbidera idatzi edota 688 62 15 35 telefono zenbakira deitu dezakezue.