Ez lurperatzen gaituen paseoari-Ekialdea Bai Auzo Elkartekoek beraien kexak bidali dizkiote alkateari

Jon Iraola alkateak herritarren kexak, iradokizunak, proposamenak eta abar kontuan hartzeko prest dagoela esan duela eta, astelehenean Urkizun elkartu ziren Ez lurperatzen gaituen paseoari-Ekialdea Bai Auzo Elkartekoak, alkateak buzoietan banatu dituen orriak bete eta beraien kexak bidaltzeko: “Estaziño eta Azitain arteko trenbidea estaltzeko proiektuarekin ados ez gaudela adierazi nahi dugu. Aspaldiko proiektu baten aurrean gaude, gaur egun hirirako proiektu estrategiko gisa mozorrotua, mugikortasun iraunkorraren atalaren barruan. Proiektu hau Europako Next generations funtsek emandako diruarekin finantzatu nahi da -16.000.000 euro- Halaber, trenbideak estaltze hutsagatik trenek igarotze-maiztasuna irabaziko dutela kontatu digute; tarte zehatz horretan trenbidearen banaketak urteak daramatzan bitartean. Gainera, eibartarroi sinetsarazi nahi digute inguruneak koherentzia urbanistikoa irabaziko duela, beste alde batetik, kaltetutako bizilagunetako batzuk euren etxeak utzi eta beste leku batera bizitzera joan daitezen gonbidatzen direnean. Zer koherentzia urbanistikoa da hori! Gezurretan oinarritutako zentzugabekeria”.

Alkateari bizilagunekin harremanetan jartzeko moduak goitik behera aldatzea ere eskatzen diote, honako proposamena luzatzeaz gain: “Zintzo lan egiteko modu bat, entzuten ikasiz eta egia esanez, batzen gaituzten gauzak bilatuz, eta ez banatzen digutenak; hiri osoaren etorkizuna jokoan dugun gauza garrantzitsuei lehentasuna emanez”.

Gainera, auzo elkarteak zortzi eskaera (2023-02-11) erregistratu ditu alkatetzan, guztiak trenbideak estaltzeko obra honekin lotuak.

1- Obraren behin betiko proiektuaren kopia.

2- 15.727.088 euroak (zerga barik) itzuli beharrik gabe jasoko direla, eta euskal herritarrek -eibartarrak barne- ez dutela euro bat gehiago gehitu beharko egiaztatzen duen agiriaren kopia.

3- Kaltetutako bizilagunen zerrenda bat. Horrekin batera, txosten bat, kasu bakoitzean izandako afekzio-maila eta mota, argi eta garbi azaltzen dituena.

4- Jarduketa-planaren edo kronogramaren kopia. Obra gauzatzean izandako gertaera esanguratsuenak zehazten dituena.

5- Obran aurreikusitako gaueko lanaldiak jasotzen dituen egutegiaren kopia.

6- Barrena kaletik zero kotan doan bidegorriaren trazadura programatzea eta kudeatzea “nahiko konplexua” dela dioen azterlan, lan edo hirigintza-oinarriaren kopia.

7.- Egindako bileren akten kopia, bai eta ETSren eta Eibarko Udalaren arteko lankidetza-hitzarmenaren zuzendaritza, koordinazio eta jarraipenerako Batzordearen bileretatik eratorritako hurrengo bileren aktak ere.

8.- ETSk zuzendaritzarako, koordinaziorako eta jarraipenerako Batzordeari bidaltzea egokitzat jo duen dokumentazioaren kopia. Baita Batzorde honetako edozein kidek eskatutako dokumentazioa ere.