Hiri-laborategi industrial bat sortuko dute Matsarian
Eibarko Udalak hiri-laborategi industrial bat jarriko du abian Matsariako industrialdean, haren berrikuntza eta biziberritzea bultzatzeko helburuarekin. Proiektua Innpulso Sareak eta Espainiar Estatuak finantzatu du, eta Matsaria teknologia industrial berrien “benetako esperimentazio-gune” bihurtzea du xede.
Udalak azaldu duenez, proiektuaren bidez jarduera ekonomiko berritzailea erakarri, espazio industrialak modernizatu eta herriak erreferente industrial gisa duen papera indartu nahi da. Horretarako, “hiri-laborategi” edo sandbox industrialaren eredua ezarriko da, enpresei, ekintzaileei eta erakundeei irtenbide teknologikoak baldintza errealetan probatzeko aukera emanez, eskala handian ezarri aurretik.
Proiektuaren bidez, energia-kontsumoa optimizatzeko adimen artifizialeko sistemak, airearen kalitatea monitorizatzeko sentsoreak, enpresen arteko ekonomia zirkularreko irtenbideak edo industria-kudeaketan aplikatutako biki digitalak probatzeko aukera izango da, besteak beste.
Jon Iraola Eibarko alkateak nabarmendu duenez, ekimena “aukera estrategiko paregabea” da Eibarko nortasun industriala indartzeko eta etorkizuneko erronketara egokitzeko. Haren esanetan, Matsaria espazio dinamiko bihurtu nahi da, jarduera ekonomiko berritzailea erakartzeko eta kalitatezko enplegua sortzeko.
Bestalde, Vanesa Hortas Ekonomiaren Garapen, Enplegu eta Berrikuntza zinegotziak azaldu du proiektuak esparru juridiko eta tekniko sendo bat beharko duela, esperimentazio-prozesuak bermeekin garatzeko. Haren hitzetan, helburua ez da soilik probak egiteko espazio bat sortzea, baizik eta berrikuntza modu ordenatuan eta arautuan kudeatuko duen eredu bat ezartzea: “Berrikuntzarekin batera politika publikoa sendoa izatea nahi dugu”.
Udalak uste du Matsariako sandbox industriala Eibarko eraldaketa ekonomikoaren estrategiaren urrats garrantzitsua izango dela, eta bertan ikasitakoa hiri osoko industria-guneetara zabaldu ahal izango dela.
