Jose Zugasti Eibarko eskultorea hil da, 72 urterekin

Jose Zugasti eskultore eibartarra 1952. urtean sortu zen, eta obra ugari utzi du; horietarik asko, Eibar bertan ikusgai direnetik aparte, Donostiako eta Bilboko kaleetan ere. Bere azken lanetako bat Donostiako Musika Hamabostaldiko aurtengo kartela izan da. Burdin hariak garrantzi berezia izan du bere eskuetan. Jose Zugastik Arte Ederrak ikasi zituen Madrilen. 1970eko hamarraldiko lehen urteetan margogintzari heldu zion, eta bereziki paisaiak landu zituen, urbanoak zein bukolikoagoak. 1980ko hamarraldian giza figura jarri zuen erdigunean, margogintzan betiere, eta hortik abstrakziora egin zuen jauzi. Berehala, burdin haria deskubritu zuen, eta geroztik ez zion inoiz utzi material hori erabiltzeari.

1984an Donostia bizitoki hartu zuenean Errenteriako Beraunen jarri zuen bere lehen tailerra. Hortxe sortu zuen bere lehen eskultura: Giza figura bat eskaileran gora. 2002an bere lehen obra publikoa instalatu zuen, Euskalduna jauregiaren inguruan, Bilbon. Haren ondoren beste obra publiko mordoa instalatu zuen, besteak beste Donostiako Tolosa hiribidean, unibertsitateen inguruan. Eibarren ipinitako obra dimentsioagatik da berezia: hamalau zentimetro lodi diren altzairuzko uztaiez egina dago, eta oinezkoak tartetik pasa litezke. 1990etik 2010era erakusketa ugaritan parte hartu zuen, besteak beste Arco, Berlin eta Londresko azoketan. Bestalde, Gasteizko Artiumen, Bilboko Arte Ederren Museoan eta Donostiako San Telmon ikus litezke haren obrak.